कलाशैली संवाददाता । नेपालमा दर्ता नभएका सामाजिक सञ्जाल बन्द गर्ने सञ्चार तथा सूचना प्रविधि मन्त्रालयको निर्णयपछि ‘हाम्रो पात्रो’ले दर्ताका लागि निवेदन दिएको छ । मन्त्रालयका प्रवक्ता गजेन्द्रकुमार ठाकुरले सरकारको उक्त निर्णयपछि ‘हाम्रो पात्रो’ले आजै सूचीकृत हुने प्रक्रियाका लागि निवेदन दिएको जनाएका छन् ।
सर्वोच्च अदालतको बृहत् पूर्ण इजलासले २०८० वैशाख १२ मा अदालतको अवहेलनासम्बन्धी मुद्दामा स्वदेशी तथा विदेशी सामाजिक सञ्जाल र अनलाइन प्लेटफर्मलाई सञ्चालन गर्नुअघि सम्बन्धित निकायमा अनिवार्य सूचीकरण गर्न आदेश दिएको थियो । उक्त आदेश पालना गर्न मन्त्रिपरिषद्को भदौ ९ गतेको बैठकले नेपालमा सामाजिक सञ्जाल सञ्चालन गर्न चाहने व्यक्ति, कम्पनी वा संस्थालाई सूचीकृत हुन आह्वान गरेको थियो ।
सामाजिक सञ्जालको प्रयोग व्यवस्थित गर्न बनेको निर्देशिका-२०८० अनुसार सञ्चार तथा सूचना प्रविधि मन्त्रालयमा अनुसूची १ को ढाँचामा तोकिएको कागजातसहित ७ दिनभित्र निवेदन दिन भनिएको थियो । मन्त्रालयले निवेदन दिँदा इच्छुक व्यक्ति, कम्पनी वा संस्थाले नेपालभित्र सम्पर्क विन्दु, आवासीय गुनासो सुन्ने अधिकारी र स्वनियम परिपालनको निगरानी अधिकारी तोक्नुपर्ने सार्वजनिक सूचना पनि जारी गरेको थियो ।
