कलाशैली संवाददाता । पपगायक अनिल सिंह र संगीत उत्पादन तथा वितरण कम्पनी म्युजिक डटकम बीच २२ वटा गीतको अधिकारबारे सहमति जुटेको छ । यस सहमतिअनुसार सिंहका दुई एल्बम ‘मेगाहर्ज’ र ‘लिमिटेड एडिसन’ मा संग्रहित गीतको अडियो अधिकार सिंहकै हुनेछ, जबकि यी गीतको अडियो भिजुअल (भिडियो) अधिकार म्युजिक डटकमको हुनेछ ।

२३ वर्षअघि म्युजिक डटकमले यी दुई एल्बममा समावेश गीतको भिडिओ बनाएको थियो । केही दिनअघि म्युजिक डटकमले सिंहलाई उनका २२ गीतलाई डिजिटल रूपमा फिर्ता गरिसकेको छ । मंगलबार बेलुका नेपाल संगीत उद्योग संघ र प्रस्तोता समाजको रोहवरमा सहमति जुटेको हो ।

केही दिनअघि म्युजिक नेपाल र म्युजिक डटकमप्रति आक्रोशित हुँदै अनिल सिंहले सामाजिक सञ्जालमा चेतावनीपूर्ण भिडियो हालेका थिए । त्यसको केही दिनपछि दुई पक्षीय सहमति जुटेको हो ।