कलाशैली संवाददाता । नेपालको चर्चित फेसन शो ‘काठमाडौं फेसन वीक’ को व्यवस्थापनको जिम्मा अब नेक्स्ट मोडल्स नेपाल ले लिने भएको छ । यस सम्बन्धमा आयोजक फेसन डिजाइनर सेन्टर (एफडीसी) नेपाल र नेक्स्ट मोडल्स नेपालबीच आगामी सिजनदेखि सहकार्य गर्ने सम्झौता भएको हो । फेसन डिजाइनरहरूको समूह एफडीसी नेपालले गत वर्षदेखि वार्षिक दुई पटक ‘काठमाडौं फेसन वीक’ आयोजना गर्दै आएको छ। यस फेसन शोले संस्कृति र परम्परालाई विशेष जोड दिँदै पर्यटन प्रवर्द्धन लाई मुख्य प्राथमिकतामा राखेको छ । नेपाली डिजाइन र मोडलहरूको मात्र सहभागिता रहने यस कार्यक्रमको मुख्य उद्देश्य नेपाली डिजाइनरहरूलाई सहयोग र प्रवर्द्धन गर्नु हो।

नेक्स्ट मोडल्स नेपालका सीईओ रवि धमला ले यसपटकबाट ‘काठमाडौं फेसन वीक’ लाई नेपालकै सबैभन्दा भव्य फेसन शो बनाउने योजना रहेको बताए । नेक्स्ट मोडल्स नेपालले यसअघि ‘मिस्टर नेपाल’, ‘मोडल हन्ट नेपाल’, ‘मिस नेपाल पिस’ र ‘डिजाइनर्स रनवे’ जस्ता प्रतिष्ठित कार्यक्रमहरू सफलतापूर्वक आयोजना गरिसकेको छ । ‘काठमाडौं फेसन वीक’ को आगामी सिजनबारे केही दिनपछि एक भव्य कार्यक्रममार्फत औपचारिक घोषणा गरिनेछ।