कलाशैली संवाददाता । ‘मिस युनिभर्स’को नेपाल फ्रेन्चाइज ‘मिस युनिभर्स नेपाल २०२५’को उपाधि सान्या अधिकारीले जितेकी छन् । बुधबार सम्पन्न ग्रान्ड फिनालेमा १४ सुन्दरीबीचको प्रतिस्पर्धाबाट सान्या विजेता बनेकी हुन् । फिनालेमा आरोही बस्नेत प्रथम उपविजेता, सोनालिशा ढुंगाना द्वितीय उपविजेता, एलिना यारी तृतीय उपविजेता र ज्योती थापा चौथो उपविजेता घोषित भए ।

विजेता सान्याले २ लाख नगदसहित हजारौं रकम बराबरका उपहार प्राप्त गरिन् । उनले आगामी २१ नोभेम्बरमा थाइल्याण्डको बैंककमा हुने ७४औं मिस युनिभर्स प्रतियोगितामा नेपालको प्रतिनिधित्व गर्नेछिन् । विजेता बनेपछि मिडियासँग कुरा गर्दै सान्याले नेपालमा पछिल्लो समय जेनजी प्रदर्शनका कारण पर्यटन क्षेत्रमा परेको असरबारे चर्चा गरिन् ।

उनले विदेशी पर्यटकलाई नेपाल शान्त भइसकेको सन्देश दिने र मिस युनिभर्समा नेपालको पर्यटन क्षेत्रसहित विविध पक्षको प्रवर्द्धन गर्ने बताइन् । मिस युनिभर्स नेपाल २०२५ की राष्ट्रिय निर्देशक संगीता पुरीले विजेताहरूलाई बधाई दिँदै आगामी दिनमा राष्ट्रको नाम राख्ने विश्वास व्यक्त गरिन् । ग्लोबल ग्ल्यामर भेन्चरले विगत केही वर्षदेखि नेपालमा मिस युनिभर्स प्रतियोगिता आयोजना गर्दै आएको छ ।