कलाशैली संवाददाता । भारतीय अभिनेता रणवीर कपूर बहुप्रतीक्षित फिल्म ‘धूम ४’ मा देखिने भएका छन् । रिपोर्टअनुसार यस फिल्ममा रणवीर पूर्णतया नयाँ र फरक लुकमा प्रस्तुत हुनेछन्, जसका लागि उनले तयारी सुरु गरिसकेका छन् । हालैका रिपोर्टहरूले दाबी गरेअनुसार ‘धूम ४’ अहिलेसम्म रिलिज भएका सबै ‘धूम’ फ्रेन्चाइजीका फिल्महरूभन्दा ठूलो र एक्सनले भरिपूर्ण हुनेछ ।
भारतीय मिडिया पिन्कभिल्लामा छापिएको खबरअनुसार आदित्य चोपडा र श्रीधर राघवन ‘धूम ४’ को कथा र पटकथा तयार गर्न लागिपरेका छन् । उनीहरू हाल कथाको ड्राफ्टमा काम गरिरहेका छन् र यसका लागि रणवीर उपयुक्त भएको बताइएको छ ।
फिल्ममा रणवीरको भूमिका उनको व्यक्तित्व सुहाउँदो बनाइएको छ । नयाँ ‘धूम’ फिल्मको एक्सन र कथाले यसलाई विश्वका उत्कृष्ट एक्सन फिल्महरूको स्तरमा पुर्याउने दाबी गरिएको छ । यो फिल्म यश राज फिल्म्सले यसअघि बनाएका जासूस युनिभर्स फिल्महरूभन्दा पूर्ण रूपमा फरक हुनेछ । फिल्मको छायांकन २०२६ को गर्मीयाम बाट सुरु हुने खबर छ ।
यो घोषणापछि सामाजिक सञ्जालमा प्रयोगकर्ताहरूको प्रतिक्रिया आउन थालेको छ । कतिपयले रणवीर कपूर फिल्ममा सामेल भएकोमा खुसी व्यक्त गरेका छन् भने कसैले ऋतिक रोशनलाई फिल्ममा कास्ट गर्न माग गरेका छन् । ‘धूम’ फ्रेन्चाइजीका यसअघिका तीन फिल्म ‘धूम’, ‘धूम २’ र ‘धूम ३’ रिलिज भइसकेका छन् ।
