कलाशैली संवाददाता । राष्ट्रिय राजनीतिमा ‘भिजिट भिसा’ प्रकरण चर्किएसँगै हरिवंश आचार्य अभिनित ६ वर्ष पुरानो गीत ‘भिजिट भिसामा’ एकाएक भाइरल भएको छ । यो गीतलाई राजनीतिक मुद्दासँग जोडेर टिकटक र रिल्स बनाउनेको संख्या ह्वात्तै बढेपछि यसको युट्युब भ्यूज ४ करोड ९ लाख नाघेको छ ।

गृहमन्त्री रमेश लेखकको सचिवालय ‘भिजिट भिसा’ प्रकरणमा संलग्न रहेको भन्दै विपक्षी दलहरूले उनको राजीनामा माग्दै संसद् अवरुद्ध गरिरहेका छन् । यो राजनीतिक माहोलमा फिल्म ‘दाल भात तरकारी’मा समावेश हरिवंश आचार्य र निरुता सिंह अभिनित ‘भिजिट भिसामा’ बोलको गीत अप्रत्याशित रूपमा चर्चामा आएको हो ।

राजनीतिक घटनाक्रमसँगै यो गीतमा टिकटक र रिल्स बनाउने लहर चलेको छ। धेरै प्रयोगकर्ताले गीतलाई राजनीतिक मुद्दाहरूसँग जोडेर भिडियोहरू सिर्जना र सेयर गरिरहेका छन्, जसले गर्दा गीतको लोकप्रियतामा उल्लेख्य वृद्धि भएको छ ।

सामाजिक सञ्जालमा गीतको चर्चासँगै युट्युबमा यसको भ्यूज संख्यामा पनि तीव्र वृद्धि देखिएको छ । यसैसाता मात्रै गीतको भ्यूज ४ करोड ९ लाख नाघेको छ, जसले भिजिट भिसा प्रकरणको प्रत्यक्ष प्रभाव गीतको लोकप्रियतामा परेको स्पष्ट पार्छ ।

यति मात्र होइन, केही दिनअघि कोशी प्रदेशको सभामा माओवादी सांसदले यही गीत गाउँदै गृहमन्त्रीको राजीनामा मागेका थिए । यसले राजनीतिक वृत्तमा पनि गीतको चर्चा र प्रभावलाई थप पुष्टि गर्छ ।