कलाशैली संवाददाता । लोकप्रिय हास्य कलाकार शिवशंकर रिजाल ‘जोगिन्दर’ ले आफ्नो चर्चित टेलिभिजन कार्यक्रम ‘जोगिन्दरको पान दुकान’ पुनः सुरु गरेका छन् । हास्यव्यङ्ग्य शैलीमा प्रस्तुत हुने यस कार्यक्रमको दोस्रो शृङ्खला गत बिहीबारदेखि प्रसारणमा आएको छ ।
शिवशंकर बागमती टेलिभिजन एचडी र ओएसआर डिजिटलमार्फत कार्यक्रम प्रत्येक बिहीबार नियमित रूपमा प्रशारण हुने जानकारी दिएका छन् । ‘जोगिन्दर पानवाला’ को उपनामबाट परिचित भएका शिवशंकरले पुराना दर्शकहरूका साथसाथै नयाँ पुस्तालाई समेत लक्षित गरेर कार्यक्रमलाई सन्देशमूलक र मनोरञ्जनात्मक ढङ्गमा प्रस्तुत गर्ने बताए ।
‘पुराना शैलीलाई कायम राख्दै केही नयाँपन भर्ने कोशिस गरेको छु । म टेलिभिजनबाट केही समय टाढा बसेँ, तर मेलामहोत्सवहरूमा दर्शकले सोधेका प्रश्न र चासोले फेरि फर्कन प्रेरित गर्यो’, उनले भने ।
कार्यक्रममा उनले पानवालाको भेषभूषा र मधेसी लवजमा पाहुनासँग संवाद गरेका छन् । पहिलो एपिसोडमा अभिनेता तथा टिकटकर पारसबम ठकुरी अतिथिको रूपमा उपस्थित भएका थिए । आगामी एपिसोडमा राजनीतिज्ञ चन्द्रकान्त (सिके) राउत अतिथि रहने हास्य कलाकार रिजालले जानकारी दिए ।
उनले ‘जोगिन्दरको पान दुकान’ शीर्षकमा अघिल्लो पटक करिब ११ वर्षसम्म टेलिभिजन कार्यक्रम सञ्चालन गरिसकेका छन् । अब यस कार्यक्रमलाई थप व्यवस्थित र शृङ्खलाबद्ध रूपमा अगाडि बढाउने योजना रहेको पनि उनले बताए ।
