कलाशैली संवाददाता । नेपाली हास्य क्षेत्रमा ‘माग्ने बुढा’का रूपमा परिचित कलाकार केदार घिमिरे पछिल्लो समयका चर्चित र महँगा कलाकारमध्ये एक हुन् । रेडियोमा अन्तर्वार्ता लिने क्रमबाट अभिनयमा प्रवेश गरेका उनले टेलिशृङ्खला हुँदै ठूलो पर्दासम्म आफ्नो पहिचान बनाएका छन् । हाल उनी निर्माता र निर्देशकको पहिलो रोजाइमा पर्ने कलाकार बनेका छन् ।
‘छक्का पञ्जा’ फिल्म शृङ्खलाबाट ठूलो पर्दामा स्थापित घिमिरेका आगामी फिल्म ‘माग्ने राजा’ प्रदर्शनरत छ । पहिलोपटक फिल्ममा मुख्य अभिनेता बनेका केदारले आफ्नो लोकप्रियतालाई प्रमाणित गरेका छन् । भदौ ६ गतेदेखि प्रदर्शनरत फिल्मले राम्रो व्यापार गरिरहेको छ । घरेलुबजारमार्फत लगानी उठाएर डायस्पोरा र डिजिटल राइट्स वापतको आम्दानी मुनाफा हुने निर्माण पक्षको भनाइ छ ।
केदार आउँदो दसैँमा ‘माइतीघर’ र तिहार ‘जेरी अन टप’ मा देखिदैछन् । अर्थात् भदौदेखि कत्तिकसम्म उनलाई दर्शकले भिन्न भिन्न फिल्ममा हेर्न पाउने छन् । यद्यपि, उनको ‘साइलेन्ट कमेडी’ फिल्ममा काम गर्ने सपना अझै पूरा भएको छैन ।
‘साइलेन्ट कमेडीले विश्वभर नेपाली कला र संस्कृति चिनाउन सकिन्छ, किनभने त्यसमा संवादको सट्टा अभिनयले बोल्छ । त्यसैले मलाई त्यस्तो विषयमा काम गर्न रहर छ’, उनले भने ।
रेडियोबाट अभिनयसम्मको यात्राघिमिरेले रेडियोमा ‘हिजो आजका कुरा’ टेलिशृङ्खलाका कलाकारसँग अन्तर्वार्ता लिने क्रममा अभिनयप्रति आकर्षित भए । आफूले लेख्न सक्ने भएकाले पनि अवसर पाएको उनको बुझाइ छ । किनकि उनले कलाकारितासँगै लेखकको काममा पनि सघाउथे । सुरुआती दिनमा उनले ‘तीतो सत्य’ र ‘जिरे खुर्सानी’मा सानो भूमिका पाए । लेखकसमेत रहेका उनले ३० सेकेन्डको टेलिशृङ्खला र एक-दुई संवाद बोल्ने अवसरलाई पनि ठूलो माने ।
‘माग्ने बुढा’को जन्म ‘जिरे खुर्सानी’मा व्यवस्थापक र अभिनेताको दोहोरो भूमिका निर्वाह गरेका घिमिरेले ‘मेरी बास्सै’मा ‘माग्ने बुढा’ पात्रमार्फत दर्शकको मन जिते । ‘मेरो उमेर कम भए पनि बुढ्यौली व्यवहार र बोलीले ‘माग्ने बुढा’लाई जीवन्त बनाएँ’, उनले भने । यो पात्र दर्शकको जीवनसँग जोडिएकाले लोकप्रिय भएको उनको ठम्याइ छ ।
‘तीतो सत्य’, ‘जिरे खुर्सानी’ र ‘मेरी बास्सै’को उतारचढावपछि दीपकराज गिरीको प्रस्तावमा घिमिरे फिल्ममा प्रवेश गरे । ‘छक्का पञ्जा’ शृङ्खलाले उनलाई ठूलो पर्दामा स्थापित गरायो । हाल उनी ‘छक्का पञ्जा ५’सम्म टिमसँगै छन्, तर अन्य फिल्ममा पनि सक्रिय छन् ।
लेखनमा सक्रिय घिमिरेले भविष्यमा फिल्म निर्देशन गर्ने योजना बनाएका छन् । ‘केही कथा लेखें, तर व्यस्तताले पूर्णता दिन सकिनँ । तर, भविष्यमा निर्देशक बन्छु’, उनले बताए ।
राजनीतिमा रुचि नभएको बताउँदै उनले भने, ‘म कलाकार भएरै सबैलाई मनोरञ्जन दिन चाहन्छु ।’ सङ्घर्षको सन्देशखाली समयमा लेखन र सिर्जनात्मक काममा रमाउने घिमिरेले सङ्घर्षबाट धेरै कुरा सिकेको बताए । अभिनेता घिमिरेसँग ‘शैली शो’ का लागि गरिएको कुराकानी यहाँ हेर्न सक्नुहुनेछ ।
