कलाशैली संवाददाता । आर्या इन्टरटेन्मेन्टको ब्यानरमा निर्माण हुने फिल्म ‘आ बाट आमा’ को शुभ मुहूर्त बिहीबार तनहुँको गलेश्वर मन्दिरमा सम्पन्न भएको छ । करिब २ सय बटुकहरूले हवनसहित पूजाआर्चना गरी फिल्मको मुहूर्त गरिएको हो । निर्माण पक्षका अनुसार, फिल्मको छायांकन सोही दिनदेखि चितवनबाट सुरु भएको छ ।
निर्देशक चन्द्र पन्तले छायांकन तालिका करिब एक महिनाको रहेको बताएका छन् । उनका अनुसार, चितवन, काठमाडौं र भारतको हैदरावादमा फिल्म खिचिनेछ । फिल्ममा अभिनेता पल शाह, दक्षिण भारतीय कलाकार प्रदीप रावत, विपना थापा, सिम्रन पन्त र उषा उप्रेती मुख्य भूमिकामा छन् । मुहूर्त समारोहमा प्रदीप रावतसहित गजित बिष्ट, माओत्से गुरुङलगायतको उपस्थिति थियो ।
निर्माता पक्षका अनुसार, ‘आ बाट आमा’ ले आमा र सन्तानबीचको स्नेह र सम्बन्धको भावनात्मक कथालाई प्रस्तुत गर्नेछ । फिल्मका निर्माता कृष्णप्रसाद सुवेदी, ध्रुव न्यौपाने र प्रकाशजंग कुँवर हुन् भने कार्यकारी निर्माता करण सिंह छन् । छायांकन निर्देशन नवराज उप्रेतीले सम्हाल्नेछन् । संगीत कोशिस क्षेत्री, बाबुल गिरी र थानेश्वर गौतमले दिनेछन् भने मुख्य सहायक निर्देशक कुलदीप शर्मा छन् ।
फिल्म २०८२ फागुन १५ बाट देशभर प्रदर्शनमा आउनेछ । निर्माण पक्षका अनुसार, फिल्मको विदेश प्रदर्शन अधिकार अष्ट्रेलिया र न्यूजिल्यान्डका लागि हिमारु इन्टरटेन्मेन्टले खरिद गरेको छ भने नेपालमा आरआर फिल्म्सले वितरणको जिम्मा लिएको छ ।
