कलाशैली संवाददाता । गत वर्ष प्रदर्शित फिल्म ‘खुस्मा’का निर्देशक अशोक थापा मगरले नयाँ फिल्म ‘जलाकी’को निर्माण थालेका छन् । यो फिल्मको पहिलो चरणको छायांकन गत चैतमा सम्पन्न भएको थियो भने दोस्रो चरणको छायांकन असोज २१ बाट सुरु हुने तयारी छ । ‘जलाकी’मा अभिनेत्री उपासना सिंह ठकुरी, अभिनेता धिरज मगर र सोनम तोप्देनको अभिनय रहेको छ ।
सोमबार फिल्मका दुई पोस्टर सार्वजनिक गरिएको छ, जसमा धिरज मगर र उपासना सिंह ठकुरीलाई प्रस्तुत गरिएको छ । यो फिल्मबाट मिस सिक्किम साहारा हाङमा लिम्बुले नेपाली रजतपटमा डेब्यू गर्दैछिन् । त्रिकोणात्मक प्रेमकथामा आधारित ‘जलाकी’मा शिल्पा मस्के, माओत्से गुरुङ, बुद्धि तामाङ, अस्तित्व भट्टचन, संगीता थापा मगर, राजु रेग्मी मगर र खड्क बहादुर पुन (खबपु) लगायतका कलाकार छन् ।
अन्य कलाकारको छनोट कार्य जारी रहेको निर्माण टिमले जनाएको छ । ‘जलाकी’ले मगर समुदायको आस्थाको प्रतीक ‘ढुंगाले चिनिएको स्तम्भ’को कथालाई प्रस्तुत गर्नेछ, जुन सम्झना र मायाको प्रतीक मानिन्छ । फिल्मको छायांकन तीन चरणमा रुकुम, रोल्पा, म्याग्दी, बाग्लुङ, पोखरा र दक्षिण कोरियामा हुने निर्देशक थापाले बताए ।
यो फिल्मले मगर र गुरुङ समुदायको संस्कृतिलाई उजागर गर्नेछ।एम मिडिया प्रालीको ब्यानरमा निर्माण हुने फिल्मका निर्माता ओम घर्ति मगर, बिर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी छन् । फिल्मको छायांकन शैलेन्द्र डी कार्कीले गर्नेछन् भने संगीत सरित राई र सुरेन्द्र रानाले दिनेछन् । गीत रचना राम अविरल विष्ट र सुरेन्द्र रानाको छ । लाइन प्रोडुसरमा राजु रेग्मी मगर र मुख्य सहायक निर्देशकमा महेश बराल तथा एसडी योगी छन् ।
