कलाशैली संवाददाता । फिल्म एक शक्तिशाली माध्यम हो, जसले भाषा, संस्कृति र सांस्कृतिक पहिचानको संरक्षण तथा प्रवर्द्धनमा महत्त्वपूर्ण योगदान पुर्याउँछ । ‘सफ्ट पावर’ को रूपमा चिनिने फिल्मले समाजको सोच र जीवनशैलीमा सूक्ष्म तर गहिरो प्रभाव पार्छ । अभिनेता खगेन्द्र लामिछानेले फिल्मको प्रभावबारे आफ्नो अनुभव सुनाए ।
‘मेरो परिवारका एक सदस्यले दक्षिण कोरियाली फिल्म हेरेर कोरियाली भाषा र शैली अँगालेका छन् । यो फिल्मको प्रभाव हो । फिल्मले मनोरञ्जन मात्र नभई कला, संस्कृति र भाषा संरक्षणमा ठूलो भूमिका खेल्छ’, उनले भने । नेपाली भाषा र संस्कृतिलाई स्वदेश र विदेशमा रहेका नयाँ पुस्तासम्म पुर्याउन फिल्म प्रभावकारी हुने उनको विश्वास छ ।
यद्यपि, यसका लागि सरकारको नीति र प्रोत्साहन आवश्यक रहेको उनले बताए । अभिनेता हरिवंश आचार्यले भारतीय फिल्म र टेलिसिरियलको प्रभाव परिरहेको महसुश गरेका छन् ।
‘यी मिडियाले हाम्रो संस्कृति, भाषा र संस्कारमा असर पारेका छन् । उदाहरणका लागि, विवाह संस्कारमा देखासिकीले आर्थिक भार थपिएको छ’, उनले भने । उनले सरकारले फिल्म र टेलिसिरियललाई संस्कृति संरक्षणको माध्यम बनाउन सहयोगी नीति ल्याउनुपर्नेमा जोड दिए । निर्देशक पुर्णेन्दु झाले विदेशी फिल्महरूले आफ्नो इतिहास र गौरवशाली कथालाई प्रस्तुत गरेर दर्शकमा देशप्रेम जगाएको बताए ।
‘नेपालमा यस्ता विषयमा फिल्म कम बन्छन् किनभने प्रोत्साहनको कमी छ’, उनले भने । नयाँ पुस्ताको सोच निर्माणमा फिल्म, नाटक र टेलिसिरियलको भूमिका रहेको उनको बुझाइ छ ।
फिल्मले मनोरञ्जनसँगै समाजको सोच, संस्कृति र जीवनशैलीमा प्रभाव पार्छ । दृश्य, संवाद र फेसनले दर्शकको मानसिकतामा असर गर्छ, जसले नयाँ सांस्कृतिक र सामाजिक प्रवृत्ति स्थापित गर्न सहयोग गर्छ । नेपालमा फिल्मलाई मनोरञ्जनको साधन मात्र नभई संस्कृति र इतिहास संरक्षणको माध्यम बनाउन राज्यको सहयोग आवश्यक छ ।
