कलाशैली संवाददाता । आगामी साउन २३ गते जनैपूर्णिमाको अवसरमा प्रदर्शन हुने फिल्म ‘सिटामोल’को ट्रेलर बुधबार सार्वजनिक गरिएको छ । ३ मिनेट २० सेकेन्डको ट्रेलरमा कमेडी, सटिक संवाद र सामाजिक व्यङ्ग्यले दर्शकको ध्यान खिच्ने संकेत गरेको छ । ट्रेलरमा नेपाली समाजका पारिवारिक झमेला, गरिबी, बेरोजगारी र सरकारी लापरबाही हास्य व्यङ्ग्य शैलीमा प्रस्तुत गरिएको छ ।

गाउँले परिवेशमा आधारित मुख्य पात्रहरूले सामान्य समस्याको समाधानमा भोग्ने दुखलाई हास्य र गम्भीरताको मिश्रणमा देखाइएको छ । ट्रेलरले सामाजिक सन्देशलाई हास्यरससहित प्रस्तुत गरी दर्शकलाई हँसाउनुका साथै सोच्न बाध्य बनाउने संकेत गरेको छ । सौगात मल्ल र बेनिशा हमालको दमदार अभिनयले ट्रेलरलाई थप आकर्षक बनाएको छ ।

निर्देशक राज बहादुर सानेले व्यङ्ग्यात्मक शैलीमा फिल्मलाई सशक्त बनाएका छन् । सम्पादन र सिनेमाटोग्राफीले ग्रामीण परिवेशलाई जीवन्त रूपमा प्रस्तुत गरेको छ । फिल्मले नेपाली समाजका दुख, विडम्बना र भ्रष्ट प्रणालीमाथि कटाक्ष गरेको ट्रेलरले देखाएको छ ।

फिल्ममा सौगात र बेनिशासँगै श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली, आराध्या राज्यलक्ष्मी डिसीले अभिनय गरेका छन् । श्री कृष्ण र जानुका यही फिल्ममार्फत नेपाली रजतपटमा डेब्यु गर्दैछन् ।

तुल्सी देवी फिल्म प्राली र जुनतारा फिल्म्सको सहकार्यमा निर्मित यो फिल्मको कथा प्रदीप भारद्वाज र निर्देशक सानेले लेखेका हुन् । सिमोस सुनुवारको प्रस्तुति रहेको फिल्ममा भुगोल कुमार कार्की र विकास राज जोशी निर्माता छन् भने अप्सरा नेपाली, अजय मल्ल र कुमार केसी कार्यकारी निर्माता र गंगाराम श्रेष्ठ सह-निर्माता छन् ।

बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको डिआई कलर, मुकेश शाहको साउन्ड डिजाइन, देव र शंकर महर्जनको द्वन्द्व निर्देशन, राकेश दाहालको पोस्टर डिजाइन र विकास तामाङ तथा धनबहादुर राईको प्रोडक्सन म्यानेजमेन्ट रहेको फिल्मलाई दिव्य सुवेदीले खिचेका हुन् ।