कलाशैली संवाददाता । अभिनेत्री उपासना सिंह ठकुरीले फिल्म ‘खुस्मा’ मार्फत ‘राष्ट्रिय चलचित्र पुरस्कार तथा सम्मान’ मा उत्कृष्ट अभिनेत्रीको अवार्ड जितेकी छिन् । सोमबार राष्ट्रपति भवन शितल निवासमा आयोजित समारोहमा उनले यो प्रतिष्ठित पुरस्कार प्राप्त गरिन् । आफ्ना आमा–बुबासँगै समारोहमा पुगेकी उपासना पुरस्कार पाउँदा भावुक र खुशी देखिन्थिन् । यो उनको करियरको पहिलो राष्ट्रिय अवार्ड हो, जसले उनको परिचयमा ‘राष्ट्रिय अवार्ड प्राप्त नायिका’को उपाधि थपिदिएको छ।
अवार्ड ग्रहणपछि उनको अनुहारमा खुशी प्रष्ट झल्किएको थियो भने तस्बिर खिच्न उनलाई भ्याइनभ्याइ भएको थियो । नेपाली फिल्ममा उपासनाको यात्रा उल्लेखनीय छ । उनले फिल्म ‘क्याप्टेन’ बाट डेब्यू गरेकी थिइन् । त्यसबेला धेरैले उनलाई यति छिटो स्थापित नायिका बन्लिन् भनेर अनुमान गरेका थिएनन् । तर, ‘२ नम्बरी’ र ‘कबड्डी कबड्डी कबड्डी’ जस्ता हिट फिल्मले उनलाई ‘लक्की नायिका’को पहिचान दिलायो ।
यद्यपि, उनको करियरमा केही असफलता पनि सामना गर्नुपर्यो । गत वर्ष रिलिज भएको फिल्म ‘कर्मा’ले अपेक्षित सफलता पाएन । तर, सोही वर्ष रिलिज भएको ‘खुश्मा’ले उनलाई अब्बल कलाकारको रूपमा स्थापित गरायो ।
