कलाशैली संवाददाता । युवापुस्तामाझ लोकप्रिय गायक महेश काफ्ले र गायिका अस्मिता अधिकारीको संयुक्त सांगीतिक कार्यक्रम ‘सोलफुल यु.एस.ए यात्रा’ घोषणा भएको छ । यो सांगीतिक भ्रमण (टुर) सन् २०२५ को अगस्टदेखि अक्टोबरसम्म संयुक्त राज्य अमेरिकाका २० भन्दा बढी विभिन्न सहरहरूमा आयोजना हुनेछ । मंगलबार आयोजित पत्रकार भेटघाटमा यस बारेमा जानकारी दिइएको हो ।

‘ओनेस्ट रियल इस्टेट’ द्वारा प्रस्तुत र ‘थ्री ई इन्टरटेन्मेन्ट’ द्वारा व्यवस्थापन गरिएको यो सांगीतिक यात्रा कोलम्बस (ओहायो), मियामी (फ्लोरिडा), ब्रानफोर्ड (कनेक्टिकट), एशबर्न (भर्जिनिया), ल्यान्कास्टर (पेन्सिलभेनिया) लगायतका २० भन्दा बढी अमेरिकी सहरहरूसम्म पुग्नेछ । थ्री ई इन्टरटेन्मेन्टका नेपाल प्रतिनिधि अन्जान बुढाथोकीले महेश र अस्मिताको अमेरिकाका विभिन्न सहरहरूमा राम्रो माग (डिमान्ड) रहेकाले यो सांगीतिक यात्राको आयोजना गरिएको बताए ।

महेश र अस्मिताले पनि आफूहरू यो सांगीतिक भ्रमणका लागि निकै उत्साहित रहेको बताए । अमेरिकामा रहेका नेपाली समुदायहरूमाझ नजिक पुगेर गीत सुनाउने मौका पाएको भन्दै उनीहरूले खुसी व्यक्त गरे । महेश र अस्मिताका ‘लजावती झार’, ‘नाच फिरिरि’ र ‘लाइटरले बिडी सल्केको’ जस्ता गीतहरू निकै सफल (हिट) छन् । यो सांगीतिक यात्राले अमेरिकामा रहेका नेपाली दर्शकहरूलाई आफ्नो मनपर्ने कलाकारसँग जोडिने अवसर प्रदान गर्नेछ।