कलाशैली संवाददाता । आगामी साउन २३ गते बाट प्रदर्शनमा आउन लागेको फिल्म ‘मोहर’ को दोस्रो गीत ‘झुम झुम झुम्किका’ सार्वजनिक भएको छ । आज सार्वजनिक गरिएको यो गीतमा एसडी योगी र विज्ञानी पराजुलीको स्वर, हर्क साउदको शब्द, र एसडी योगीकै सङ्गीत रहेको छ ।

गीतको भिडियोमा फिल्मका मुख्य कलाकार पल शाह र बेनिशा हमाल लाई फिचरिङ गरिएको छ । भिडियोमा यी दुई कलाकार छमछमी नाचेका छन्, जसले उनीहरूको जीवन्त नृत्य प्रस्तुत गरेको छ । भिडियोमा उनीहरूको नोकझोक पनि देख्न सकिन्छ, जसले फिल्मभित्र पल र बेनिशाको केमेस्ट्री कस्तो छ भन्ने सङ्केत गर्छ ।

यसअघि सार्वजनिक फिल्मको शीर्षक गीतमा पल शाह र नीति शाहको जोडीलाई देखाइएको थियो । यस नयाँ गीतको भिडियोमा भने पलले लामो कपाल पालेका छन् । गीतमा फिल्मकी अर्की मुख्य कलाकार मिथिला शर्मा र बालकलाकार सारा शर्मालाई पनि देख्न सकिन्छ । फिल्म मेकर्स प्रा. लि. को ब्यानरमा निर्माण भएको यो फिल्मका निर्माता चुम्बन जङ्ग शाही हुन् । फिल्ममा अर्जुन जङ्ग शाही, रवीन्द्र झा र लक्ष्मी गिरीको पनि मुख्य भूमिका रहेको छ ।

फिल्ममा कुमार महर्जनको एक्सन निर्देशन, दिपेन बस्न्यातको छायांकन, सुरेश अधिकारी, एसडी योगी र थानेश्वर गौतमको सङ्गीत रहेको छ । फिल्मको टिजरले दर्शकबाट उत्कृष्ट प्रतिक्रिया पाइसकेको छ । देउकी प्रथाको कथामा तयार भएको यो फिल्ममा गिरिराज घिमिरेको मुख्य सहायक निर्देशन छ । लक्ष्मण राज पौडेल निर्माण नियन्त्रक रहेको यो फिल्मको सार्वजनिक गीतमा कविराज गहतराज को कोरियोग्राफी रहेको छ ।