कलाशैली संवाददाता । यही असार २७ गते बाट प्रदर्शनमा आउन लागेको फिल्म ‘यो मन त मेरो नेपाली हो’ को शीर्षक गीत सार्वजनिक भएको छ । देशभक्ति भावनाको कथावस्तु समेटिएको यो फिल्मको शीर्ष गीतको भिडियोमा मुख्य कलाकारहरू विजय बराल, रोशन श्रेष्ठ, विल्सन विक्रम राई, आयुशा समाल, बुद्धि तामाङ र निर्देशक मित्र प्रधानले अभिनय गरेका छन् ।

जरसिंह पौवास्थित साँगा चोकमा खिचिएको यस गीतमा विकास चौधरीको सङ्गीत, शंकर अधिकारी ‘घायल’ को शब्द र कमल रसाइलीको गायन रहेको छ । गीतले फिल्मको कथावस्तुलाई सशक्त रूपमा दर्शाउँछ । कविराज गहतराजको नृत्य निर्देशन रहेको यो गीतको भिडियोमा करिब २०० वटा राष्ट्रिय झन्डाको प्रयोग गरिएको छ, जसले देशभक्ति भावनालाई थप उजागर गरेको छ ।

पद्मा ईश्वर इन्टरटेन्मेन्ट प्रा.लि. को प्रस्तुतिमा मित्र प्रधान प्रस्तुतकर्ता रहेको ‘यो मन त मेरो नेपाली हो’ लाई ज्ञान बहादुर प्रधान (रोशन) ले निर्माण गरेका हुन् । फिल्ममा विजय बराल, रोशन श्रेष्ठ, विल्सन विक्रम राई, आयुशा समाल, बुद्धि तामाङ, मित्र प्रधानका साथै नारायण खाती, भुपेन्द्र लिङ्देन, सुबास भण्डारी, विजय सुब्बा, विजिता परियार, देवराज राजबन्शी र भानुभक्त सिटौला लगायतका कलाकारहरूको पनि अभिनय रहेको छ ।

मित्र प्रधान (नर) को निर्देशन रहेको यस फिल्ममा शिवम् अधिकारीको लेखन रहेको छ । सौरभ लामाको छायांकन, देव महर्जनको द्वन्द्व निर्देशन, समिर मियाको भिएफएक्स, कविराज गहतराज र प्रमोद भण्डारीको कोरियोग्राफी, बनीश शाहको सम्पादन तथा सीजीआई सत्यम रानाको योगदान रहेको छ । फिल्ममा दीपक शर्मा, विकास चौधरी र थोरम्पो ह्यङ राईको सङ्गीत रहेको छ भने दीपक शर्मा, विल्सन विक्रम राई, शंकर अधिकारी ‘घायल’ को शब्द तथा खैजडी गीतमा अनिश अधिकारीको शब्द सङ्कलन रहेको छ । यो फिल्मलाई आरआर फिल्म्सले वितरण गर्दैछ ।