कलाशैली संवाददाता । फिल्म ‘मिरमिरे’ को छायांकन काभ्रेपलाञ्चोकको पनौती नगरपालिका–११, बल्थलीस्थित श्री लड्केश्वर आधारभूत विद्यालय परिसरमा क्यामेरा पूजासहित सुरु भएको छ । एक हप्ता लामो वर्कशपमा बसेको निर्माण टिम शुक्रबार काठमाडौंबाट छायांकनका लागि निस्किएको थियो ।

फिल्मका निर्देशक यम शेर्पाले ‘मिरमिरे’ को छायांकन आज (शनिबार) बाट सुरु भएको र करिब ३५ दिनसम्म चल्ने जानकारी दिए । उनका अनुसार फिल्मको अधिकांश छायांकन काभ्रेका विभिन्न स्थानमा हुनेछ । निर्देशक शेर्पाले नै फिल्मको कथा पनि लेखेका छन् ।

यार्सा फिल्म्सको प्रस्तुति रहेको यस फिल्ममा दयाहाङ राई, प्रकाश सपुत र सिर्जना निङलेखु मुख्य भूमिकामा छन् । प्रकाश र दयाहाङको यो पहिलो सहकार्य हो । यम शेर्पाले भने दयाहाङसँग दोस्रोपटक काम गर्न लागेका हुन्, यसअघि उनको पहिलो निर्देशन रहेको फिल्म ‘कार्साङ’ मा पनि दयाहाङले अभिनय गरेका थिए ।

अन्य कलाकारहरूमा माओत्से गुरुङ, छुल्ठिम गुरुङ, भोलाराज सापकोटा रहेका छन् । बालकलाकारहरूमा शाइसा गौचन, दिविशा पन्त, चिराग श्रेष्ठ र नमनराज गजुरेल छन् । निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको ‘मिरमिरे’ का सह-निर्माताहरूमा गोविन्द बोहरा, सुदिप कुँवर र ईश्वर श्रेष्ठ छन् । फिल्मका कार्यकारी निर्मातामा आरआर फिल्म्सका सञ्चालक तथा फिल्म वितरक रोहित कट्टेल रहेका छन् ।

फिल्मका छायाकार आलोक शुक्ला हुन् । सुदिप कुँवर मुख्य सहायक निर्देशक, सञ्जु थलाङ लिम्बु मेकअप आर्टिस्ट र दिलीप पन्त निर्माण नियन्त्रक रहेका छन् । निर्माण पक्षले फिल्मको कथाबारे भने केही खुलाउन चाहेको छैन । ‘मिरमिरे’ २०८२ मा रिलिज हुनेछ, तर प्रदर्शन मिति भने तय भएको छैन । फिल्मलाई आरआर फिल्म्सले वितरण गर्नेछ ।