कलाशैली संवाददाता । नेपाली फिल्म ‘ऊनको स्वीटर’ ले शनिबार साँझ राजधानीमा आफ्नो सफल प्रदर्शनको ५१ दिने उत्सव मनाएको छ। देशभरका करिब ४० वटा हलहरूमा सफलतापूर्वक ५१औँ दिन प्रदर्शन पूरा गरेको यस फिल्मको सफलता साट्न आयोजित विशेष कार्यक्रममा फिल्म युनिट, शुभचिन्तकहरू, लगातार ५१ दिनसम्म प्रदर्शन गरिरहेका हलका प्रतिनिधि, वितरकहरू तथा पत्रकारहरूको बाक्लो उपस्थिति थियो।
कार्यक्रममा फिल्म युनिट, हलहरू र स्वदेशी तथा ओभरसिज वितरकहरूलाई निर्माता संस्था आर्टमाण्डूका निर्देशक तथा ‘ऊनको स्वीटर’ का निर्देशक नवीन चौहान, निर्माणमा सहकार्य गरेको केन्द्र मोसन पिक्चर्सका सञ्चालक केन्द्र लिम्बु, कार्यकारी निर्माताहरू मिलन खत्री र सागर बुढाथोकी लगायतले प्रशंसा पत्र प्रदान गरे ।
निर्देशक नवीन चौहान तथा कलाकारहरू विपिन कार्की र मिरुना मगरले सबै दर्शक, शुभचिन्तक तथा समर्थकहरूलाई धन्यवाद व्यक्त गरे । नेपाली फिल्म क्षेत्रमा ५१ दिन प्रदर्शन हुनुलाई ठूलो सफलता मानिन्छ । वैशाख २६ गतेदेखि प्रदर्शनमा आएको ‘ऊनको स्वीटर’ ले दर्शकहरूको मन जित्दै बक्स अफिसमा राम्रो प्रदर्शन गरिरहेको छ। हालसम्म यस फिल्मले ११ करोडभन्दा बढी को व्यापार गरिसकेको छ।
फोटो : कुवेर डंगोल / कलाशैली
