कलाशैली संवाददाता । नेपाली फिल्मको इतिहासमा एउटा महत्त्वपूर्ण क्षणका रूपमा नेपालको पहिलो फिल्म ‘आमा’ को पोस्टर हुलाक टिकटमा अंकित गरिएको छ । सोमबार फिल्म विकास बोर्डले आफ्नो २५ औं वार्षिकोत्सवको अवसरमा आयोजित विशेष कार्यक्रममा यो घोषणा गरेको हो । विसं २०२१ असोजमा प्रदर्शन भएको ‘आमा’ लाई नेपालको पहिलो फिल्म मानिन्छ, जसले नेपाली फिल्म उद्योगको सुरुवात गरेको थियो । हिरासिंह खत्रीले निर्देशन गरेको यस फिल्ममा शिवशंकर खत्री र भुवन चन्दले मुख्य भूमिका निर्वाह गरेका थिए ।
हुलाक सेवा विभागले १० रुपैयाँ दरका दुईवटा टिकट प्रकाशन गरेको छ, जसमा फिल्म ‘आमा’ का नायक र नायिकाको तस्बिर अंकित छ । टिकटको प्रथम दिवसीय आवरणमा विशेष टाँचा प्रदान गरिएको छ ।
टिकट अनावरण समारोहमा अभिनेत्री भुवन चन्द, चैत्य देवी, बसुन्धरा भुसाल, सञ्चारमन्त्री पृथ्वीसुब्बा गुरुङ, सञ्चार सचिव राधिका अर्याल, बोर्ड अध्यक्ष दिनेश डिसी र हुलाक सेवा विभागकी महानिर्देशक मनमाया भट्टराई पंगेनीले संयुक्त रूपमा सहभागिता जनाएका थिए । हुलाक सेवा विभागकी शाखा अधिकृत चन्द्रा थापाले टिकटको टाँचा तयार गरेकी हुन् । यो टिकटले नेपाली फिल्मको प्रवर्द्धनमा महत्त्वपूर्ण योगदान पुर्याउने अपेक्षा गरिएको छ।
तस्बिरहरू : कुवेर डंगोल / कलाशैली
