कलाशैली संवाददाता । नेपाल चलचित्र विकास बोर्डको २५औँ वार्षिकोत्सवको अवसरमा सोमबार आयोजित कार्यक्रममा सञ्चार तथा सूचना प्रविधिमन्त्री पृथ्वीसुब्बा गुरुङले सर्वाधिक कमाइ गर्ने २५ फिल्मलाई सम्मान गरेका छन् । मन्त्री गुरुङसहित सञ्चार मन्त्रालयकी सचिव राधिका अर्याल, बोर्डका अध्यक्ष दिनेश डिसी र प्रथम अभिनेत्री भुवन चन्दले ती फिल्मका निर्माता, निर्देशक र कलाकारलाई सम्मान प्रदान गरेका थिए ।
कार्यक्रममा सर्वाधिक कमाइ गर्ने फिल्म ‘पूर्णबहादुरको सारङ्गी’ का अभिनेता विजय बराल, निर्देशक सरोज पौडेल र निर्माता विनोद पौडेलले सम्मान ग्रहण गरे । यो फिल्मले १७ लाख टिकट बिक्री गर्दै ४६ करोड ८७ लाख ४१ हजार ४९७ रुपैयाँ व्यापार गरेको थियो । बोर्ड स्थापना भएको विसं २०५७ असार १६ देखि हालसम्म सर्वाधिक कमाइ गर्ने फिल्मको दोस्रो स्थानमा ‘कवड्डी–४’ रहेको छ, जसले २१ करोड ४० लाख ७५ हजार २१० रुपैयाँ कमायो । उक्त फिल्मका अभिनेता दयाहाङ राई, विजय बराल र बुद्धि तामाङले सम्मान ग्रहण गरे । तेस्रो स्थानमा ‘१२ गाउँ’ (१९ करोड ९२ लाख ७७ हजार ७६३ रुपैयाँ), चौथोमा ‘छक्का पञ्जा ४’ (१७ करोड ५३ लाख २ हजार ६११ रुपैयाँ) र पाँचौँमा ‘जारी’ (१७ करोड ४८ लाख १ हजार ४५९ रुपैयाँ) ले सम्मान प्राप्त गरे ।
अन्य सम्मानित फिल्महरूमा छैटौँ स्थानमा ‘छक्का पञ्जा १’ (१६ करोड १० लाख २२ हजार ३५० रुपैयाँ), सातौँमा ‘महाजात्रा’ (१५ करोड ६७ लाख ९९ हजार ६१४ रुपैयाँ), आठौँमा ‘छक्का पञ्जा ५’ (१५ करोड २० लाख ३६ हजार ८८३ रुपैयाँ), नवौँमा ‘कोहिनुर’ (१४ करोड ७५ लाख ५० हजार २५४ रुपैयाँ) र दशौँमा ‘छक्का पञ्जा २’ (१४ करोड ५१ लाख ५४ हजार २३० रुपैयाँ) रहेका छन् ।
थप सम्मानित फिल्महरूमा ‘शत्रु गते’ (१२ करोड ६५ लाख ८२ हजार १३५ रुपैयाँ), ‘ऊनको स्वीटर’ (११ करोड ६ लाख ७६ हजार ६२१ रुपैयाँ), ‘कवड्डी–२’ (१० करोड ३५ लाख ३२ हजार २० रुपैयाँ), ‘बोक्सीको घर’ (१० करोड १० लाख २० हजार ९१७ रुपैयाँ), ‘छ माया छपक्कै’ (९ करोड ९२ लाख ८७ हजार १३९ रुपैयाँ), ‘दिमाग खराब’ (८ करोड ९८ लाख ६ हजार ९०७ रुपैयाँ), ‘अञ्जली’ (८ करोड ८३ लाख ५९ हजार ८४५ रुपैयाँ), ‘परदेशी २’ (७ करोड ९२ लाख ३८ हजार २४० रुपैयाँ), ‘छक्का पञ्जा ३’ (७ करोड ८३ लाख ८ हजार ८१ रुपैयाँ), ‘प्रेमगीत–३’ (७ करोड ६३ लाख ४५ हजार ३९२ रुपैयाँ), ‘कवड्डी कवड्डी कवड्डी’ (७ करोड ५९ लाख ५० हजार ६९२ रुपैयाँ), ‘पुजार सार्की’ (७ करोड ३८ लाख २३ हजार १८७ रुपैयाँ), ‘महापुरुष’ (७ करोड ३५ लाख ७९ हजार ८८५ रुपैयाँ), ‘कवड्डी’ (७ करोड ३४ लाख ९५ हजार २५० रुपैयाँ) र ‘पशुपति प्रसाद २: भष्मे डन’ (७ करोड ३२ लाख २० हजार रुपैयाँ) ले सम्मान प्राप्त गरे।
बोर्डका अध्यक्ष दिनेश डिसीले सर्वाधिक व्यापार गर्ने फिल्मको सूची सार्वजनिक भएपछि कमाइबारे भ्रम फैलाउने प्रवृत्तिको अन्त्य भएको बताए । ‘कतिपयले फिल्मको कमाइबारे भ्रामक प्रचार गर्छन्। त्यसलाई रोक्न र पारदर्शिता कायम गर्न हामीले पछिल्लो २५ वर्षका सर्वाधिक कमाइ गर्ने २५ फिल्मलाई सम्मान गरेका हौँ । यो हाम्रो र फिल्मकर्मीहरूको साझा खुसीको क्षण हो’, उहाँले भन्नुभयो ।
अध्यक्ष डिसीले ‘बक्सअफिस @सिनेपा’ एपको शुभारम्भले रियल टाइम डाटा निर्माता र वितरकलाई उपलब्ध गराउने बताए ।
