कलाशैली संवाददाता । सलोन सलिना फिल्म्सको ब्यानरमा निर्माण भएको फिल्म ‘पीआर’ को टिजर सार्वजनिक गरिएको छ । बिहीबार राजधानीमा एक कार्यक्रमको आयोजना गरी यसको टिजर रिलिज गरिएको हो । टिजरमा अस्ट्रेलियामा रहेका विद्यार्थीहरूको संघर्ष, उनीहरूले भोग्ने दुःख र नेपालमा रहेका परिवारको पीडालाई समसामयिक विषयका रूपमा देखाइएको छ ।

फिल्ममा आर ए सुरज पौडेल, राजन कुँवर, विनिता कार्की, पुजा चौधरी, बिमला खत्री, अस्मा अधिकारी, कुशल थापा, गणेश बुढाथोकी, कृष्ण थापा, म्याक्स र नवीन घायलको अभिनय छ । त्यसैगरी, विशेष भूमिकामा नीर शाह, गौरी मल्ल, रविन्द्र खडका, दिक्पाल कार्की र उत्तम केसीले अभिनय गरेका छन् । रन्जित शाह (आरएफएम फ्यासिलिटी म्यानेजमेन्ट अस्ट्रेलिया) र सन्तोष तिवारी (लेन वे डम्प्लिङ, सिड्नी) प्रस्तुतकर्ता रहेको यस फिल्मको निर्देशन तथा कथा शोभित बस्नेतले गरेका हुन् ।

यस फिल्मका निर्माताका रूपमा ए वान ग्रुप सर्भिसका प्रदीप दाहाल र इन्द्रेणी ग्रुपका लक्ष्मण सापकोटा रहेका छन् । फिल्ममा मानस राज र भिम बिसीको संगीत, रामजी लामिछानेको नृत्य, गणेश बुढाथोकीको पटकथा र संवाद, सौरभ सायमी (अस्ट्रेलिया) र सौरभ लामा (नेपाल)को छायांकन र बन्दे प्रसादको सम्पादन रहेको छ । यस फिल्मको मुख्य सहायक निर्देशकका रूपमा रामजी राउत, गणेश बुढाथोकी र मणि तामाङ रहेका छन् ।

केवल मान सिंह बस्नेतको निर्माण व्यवस्थापन रहेको यो फिल्मको ६० प्रतिशत छायांकन अस्ट्रेलियाको विभिन्न सहरमा र ४० प्रतिशत नेपालमा गरिएको निर्देशक बस्नेतको भनाइ छ । निर्माण पक्षका अनुसार, यो फिल्म यसै महिनाको अन्तिमबाट अस्ट्रेलिया र न्युजिल्यान्डका सबै सहरमा रिलिज गरिँदैछ । यसबाहेक, दशैँको आसपासमा विश्वव्यापी रूपमा रिलिज गरिने निर्माण पक्षको भनाइ छ । यो फिल्मलाई आरआर फिल्म्स ले वितरण गर्दैछ ।