कलाशैली संवाददाता । पूजा गुरुङ र जश्मिन श्रेष्ठको लगानीमा तयार भएको फिल्म ‘हली’ को प्रमोशनल गीत ‘चान्स पाएँ त’ आज सार्वजनिक गरिएको छ । काठमाडौंमा आयोजित एक कार्यक्रममा यो गीत सार्वजनिक गरियो, जसमा बाबुल गिरी र शान्तिश्री परियार को स्वर, जश्मिन श्रेष्ठ को शब्द र बाबुल गिरीकै संगीत रहेको छ ।
निकै कर्णप्रिय रहेको यो गीतको भिडियोलाई पनि आकर्षक बनाइएको छ । सार्वजनिक प्रमोशनल गीतमा फिल्मका मुख्य नायक प्रमोद दीपसँगै कलाकारहरू दीपाश्री निरौला, किरण केसी, दीलिप रायमाझी, प्रियंका कार्की र पूजा शर्माले नृत्य गरेका छन् । कलाकारहरूको बलियो नृत्यले गीतको भिडियोलाई सशक्त बनाएको निर्माण टिमको भनाइ छ । यो गीतको भिडियोलाई कविराज गहतराजले कोरियोग्राफी गरेका हुन् भने, विपिन मल्ल ले सम्पादन गरेका छन् ।
वास्तविक जीवनका घटनाहरूबाट प्रेरित भनिएको यो फिल्मले देशमा परिवर्तन ल्याउनका लागि एक जना ‘हली’ नै काफी रहेको कथा बताउने निर्मात्री जश्मिन श्रेष्ठले जानकारी दिइन् । आफूहरूलाई दर्शकले साथ दिएको खण्डमा निरन्तर रूपमा फिल्ममा काम गर्ने उनको भनाइ थियो । शुभ चिरायू फिल्म्ससँग जापुरा फिल्म्स प्रोडक्सनको सहकार्यमा निर्माण गरिएको यो फिल्ममा ओम प्रतीकको लेखन तथा निर्देशन छ । नम्रता भण्डारी सह–निर्माताको रूपमा छिन् ।
फिल्ममा प्रमोद दीप, सुजता थापा, ओम प्रतीक, सरोज खनाल, अरुणा कार्की, अर्जुन गुरुङ, विद्या कार्की, नवीन श्रेष्ठ, कञ्चन दुलाल, कमल गाउँले र विशाल पहाडी को अभिनय छ ।
अर्जुन भुसाल कार्यकारी निर्माता रहेको फिल्ममा लक्ष्मण बज्राचार्य लाइन प्रोड्युसर, जीवननाथ गौतम मुख्य सहायक निर्देशक, रामप्रसाद चौधरीको सम्पादन छ । फिल्ममा राहुल राईको छायांकन रहेको छ । यसैगरी, फिल्ममा शम्भुजित बास्कोटा, बाबुल गिरी र कृष्ण भारद्धाजको संगीत, कुमार महर्जनको एक्सन, कविराज गहतराज र ओम प्रतीकको कोरियोग्राफी रहेको छ ।
