कलाशैली संवाददाता । हलिउड फिल्म ‘आइस रोड: भेन्जिन्स’ को ट्रेलर सार्वजनिक भएको छ । २ मिनेटभन्दा लामो यो ट्रेलरमा नेपालको कथावस्तुलाई प्रमुखताका साथ चित्रण गरिएको छ । फिल्मको केही भाग भक्तपुर र काठमाडौंमा पनि छायांकन भएको थियो भने, नेपालको जस्तै सेट निर्माण गरी अस्ट्रेलियामा समेत छायांकन गरिएको थियो ।
सन् २०२१ मा रिलिज भएको ‘आइसरोड’ को यो दोस्रो शृङ्खला हो । अमेरिकन एक्सन थ्रिलर फिल्मलाई जोनाथन हेन्स्ले ले निर्देशन गरेका हुन् । फिल्मको नेपाल छायांकनको व्यवस्थापन रामकृष्ण पोखरेलको आइसफल प्रोडक्सनले हेरेको थियो ।
फिल्ममा अभिनेता लिएम नीसनले माइक म्याक्कनको भूमिका निर्वाह गरेका छन् । २ मिनेट लामो ट्रेलरको कथावस्तु हिमालयको सेटिङमा हुने एक्सनमा आधारित छ । फिल्मको मुख्य पात्र माइक आफ्नो भाइको इच्छानुसार अन्त्येष्टिका लागि अस्तु बोकेर नेपालको सगरमाथा क्षेत्रमा आउँछ । १२ हजार फिट उचाइमा माइक र उनको टोली चढेको खचाखच भरिएको बसमा आक्रमण हुन्छ । दुश्मनसँगको मुठभेडमा आफू र निर्दोष यात्रुहरूलाई बचाउन माइकले लड्नुपर्छ । यो लडाइँमा नेपाली गाउँका स्थानीयवासी पनि सहभागी हुनेछन् ।
