कलाशैली संवाददाता । अनन्या फिल्मस्’को ब्यानरमा फिल्म ‘घोस्टेल’को निर्माण घोषणा भएको छ । बुधबार निर्माण कम्पनिले थीम पोस्टर सार्वजनिक गर्दै फिल्म निर्माणबारे जानकारी गराएको हो ।
सार्वजनिक पोस्टरमा जब त्रासले हाँसो भेट्छ लेखिएको छ, जसले यो फिल्म हरर कमेडी जनरामा तयार हुने संकेत गर्छ । सन् २०२६ मा सार्वजनिक प्रदर्शनमा ल्याउने लक्ष्य राखिएको यो फिल्मको ‘कास्ट एण्ड क्रू’बारे निर्माण टिमले केहि बताएको छैन । प्रमुख अभिनयमा रहने कलाकारहरू सार्वजनिकसँगै फिल्मको थप विवरण पनि खुलाउँदै जाने निर्माता सरोज न्यौपानेले बताए ।
न्यौपानेसँग फिल्म निर्माणमा सुयोग गुरुङले सहकार्य गरेका छन् । फिल्मको कथा सुयोग गुरुङको नै हो । ‘जेरी अन टप’ निर्माता न्यौपाने र निर्देशक गुरुङ उक्त फिल्मको छायांकन सकाएसँगै एकसाथ नयाँ फिल्म निर्माणमा जुटेका हुन् ।
यो फिल्मलाई सुरज सुनुवारले निर्देशन गर्नेछन् । ‘षडङ्ग’ फेम्ड निर्देशक सुनुवारको पछिल्लो फिल्म ‘खजुरे ब्रो’ गतवर्ष प्रदर्शनमा आएको थियो । ‘घोस्टेल’ सुनुवारको तेस्रो निर्देशकीय फिल्म हुनेछ । ‘जेरी अन टप’ आगामी तिहारमा प्रदर्शनमा आउँदैछ, यो फिल्मको प्रदर्शनपछि ‘घोस्टेल’को छायांकन प्रारम्भ हुने निर्माण पक्षले जनाएको छ ।
