कलाशैली । आगामी साउनको अन्तिम साताबाट छायांकनमा जाने तयारीमा रहेको फिल्म ‘राम नाम सत्य’ को प्रि-प्रोडक्सनको काम धमाधम चलिरहेको छ । यसै क्रममा फिल्मका लागि कलाकार छनोट प्रक्रिया पनि तीव्र पारिएको छ । फिल्ममा नायकद्वय विराज भट्ट र सुशील श्रेष्ठ, तथा नायिकाद्वय दिव्या रायमाझी र सुपुष्पा भट्ट यसअघि नै फाइनल भइसकेका छन् । अब फिल्ममा अनुभवी कलाकार सुनील थापा लाई पनि अनुबन्धित गरिएको छ । निर्देशक माइकल चन्दका अनुसार, सुनील थापालाई यसपटक बिल्कुलै फरक गेटअपमा प्रस्तुत गर्ने तयारी गरिएको छ ।

निर्देशक माइकल चन्दले फिल्मलाई लभस्टोरी, एक्सन, रोमान्स र सस्पेन्स शैलीमा बनाउने तयारी गरिरहेका छन् । नायक सुशील श्रेष्ठ ‘परिवर्तन’ नामक फिल्मको सेटबाट फर्किएसँगै फिल्मको वर्कशप सुरु हुने निर्देशक चन्दले बताए ।

माइकल इन्टरटेन्मेन्ट हाउस को ब्यानरमा निर्माण हुन लागेको यो फिल्ममा उपेन्द्र शाही, श्वेता विमली र उत्तम गुरुङ को लगानी रहनेछ । फिल्मका कार्यकारी निर्माताहरू डाक्टर डी.आर. उपाध्याय, टी.आर. गौडेल र नरेन्द्र शाह हुन्। फिल्ममा महेश पौडेल को डीओपी (डाइरेक्टर अफ फोटोग्राफी) रहनेछ । यस फिल्मका लागि साउथका कलाकार तथा एक्सन निर्देशकहरूसँग पनि सहकार्य गर्ने तयारी गरिएको छ ।