कलाशैली संवाददाता । कवि तथा निर्देशक उपेन्द्र सुब्बाको तेस्रो फिल्म ‘जारी २’ को छायांकन सम्पन्न भएको छ । सम्पूर्ण छायांकन पाँचथरमा गरिएको यस फिल्मको काम ३६ दिनमा ‘प्याकअप’ गरिएको हो । निर्माण कम्पनी बाँसुरी फिल्म्सले छायांकन सकिएको जानकारी दिँदै फिल्म आगामी बडादशैँको अवसरमा रिलिज हुने जानकारी दिएको छ । यद्यपि, निर्माण टिमले कुन मितिमा रिलिज हुन्छ भन्ने कुरा भने खुलाएको छैन ।
छायांकन सकिएसँगै निर्माण टिमले फिल्मका मुख्य कलाकार दयाहाङ राई र मिरुना मगर को क्यारेक्टर लुकसमेत सार्वजनिक गरेको छ । सार्वजनिक तस्वीरमा मिरुनालाई लिम्बू पहिरनमा र दयाहाङलाई च्याब्रुङ बजाउँदै गरेको अवस्थामा देख्न सकिन्छ । यो फिल्मको स्लोगन ‘सङ्ग अफ च्याब्रुङ’ राखिएको छ ।
‘जारी २’ मा २०८० सालको ब्लकबस्टर फिल्म ‘जारी’ का निर्देशक उपेन्द्र सुब्बाकै लेखन रहेको छ । कवि सुब्बाको डेब्यु निर्देशन रहेको ‘जारी’ ले नेपाली बक्सअफिसमा १७ करोडभन्दा माथिको व्यापार गरेको थियो । त्यसैले, निर्माण घोषणासँगै ‘जारी २’ दर्शकको प्रतीक्षामा छ ।
बाँसुरी फिल्म्स र कबड्डी फिल्म्सको ब्यानरमा निर्माण भएको यस फिल्मका निर्माता सफल निर्देशक रामबाबु गुरुङ हुन् । फिल्ममा दयाहाङ राई र मिरुना मगरसँगै विजय बराल, ऋचा शर्मा, बुद्धि तामाङ, पुष्कर गुरुङ, प्रेम सुब्बा, माओत्से गुरुङ, मानहाङ लावती, बिष्णु मोक्तान, कमलमणि नेपाल, अनिल सुब्बा, रेखा लिम्बू, बेदना राई र सिर्जना निङ्लेखु को अभिनय रहेको छ ।
