कलाशैली संवाददाता । अक्षय कुमार अभिनीत भारतीय फिल्म ‘हाउसफुल ५’ले बक्स अफिसमा उत्साहजनक प्रदर्शन गर्दै पाँच दिनमा १ सय १६ करोड भारू कमाएको छ । मंगलबारसम्म भारतमा यो कमाइ गरेको हो ।

दर्शकमाझ बहुप्रतीक्षित यो फिल्मले पहिलो दिन २४ करोड ३५ लाख भारूको ओपनिङ गरेको थियो । दोस्रो दिन शनिबार ३२ करोड ३८ लाख, आइतबार ३५ करोड १० लाख, सोमबार १३ करोड १५ लाख र मंगलबार ११ करोड ७० लाख भारू कमाएको भारतीय मिडियाले उल्लेख गरेका छन् ।

तरूण मनसुखानीद्वारा निर्देशित र साजिद नाडियाडवालाद्वारा निर्मित यो हास्य विधाको फिल्ममा अक्षय कुमारसहित अभिषेक बच्चन, रितेश देशमुख, ज्याकलिन फर्नान्डेस, सञ्जय दत्त, नाना पाटेकर, ज्याकी श्राफलगायत कलाकारको अभिनय छ । नेपालमा पनि यो फिल्मले राम्रो कमाइ गरिरहेको छ । नेपालका वितरकले फिल्म हेर्ने दर्शक चाँप बढ्दो रहेको जानकारी गराएका छन् । यसले नेपालमा तीन करोड रुपैयाँ बढी ग्रस कलेक्सन गरेको जानकारले बताएका छन् ।