कलाशैली संवाददाता । नेपाली फिल्म उद्योगमा फिल्म ‘बलिदान’ को लागि अभिनेता सौगात मल्लको लुक सार्वजनिक गरिएको छ । आगामी बडादसैँको फूलपातीका दिन प्रदर्शनमा आउने तयारीमा रहेको यस फिल्मका दुई पोस्टरमा अभिनेता मल्ल एक सशक्त र रहस्यमय अवतारमा देखिएका छन् ।
सार्वजनिक भएको एक पोस्टरमा मल्लको एउटा आँखा कालो रङको छ । उनले लामो दाह्री, केश र गाढा रङको वस्त्र धारण गरेका छन् । उनको हातमा बलिरहेको राँको देखिन्छ । पृष्ठभूमिमा अन्य मानिसहरूको समूह र आगोको ज्वालाहरू पनि देख्न सकिन्छ, जसले फिल्मको कथावस्तु द्वन्द्वात्मक प्रकृतिको रहेको सङ्केत गर्छ । अर्को पोस्टरमा अभिनेता मल्ल हातमा हतियार बोकेर लडाइँको परिवेशमा देखिएका छन् । निर्देशक सन्तोष सेनका अनुसार, ‘बलिदान’ मा अभिनेता मल्लको बिल्कुलै फरक अवतार रहेको छ, जसका लागि उनले अधिक मेहनत गरेका छन् ।
सौगात नेपाली फिल्म क्षेत्रमा आफ्नो अभिनय कलाका लागि परिचित छन् र उनका हरेक नयाँ भूमिकालाई दर्शकले निकै चासोका साथ हेर्ने गर्छन् । ‘बलिदान’ मा उनको यो फरक र शक्तिशाली गेटअपले दर्शकहरूलाई सिनेमा घरसम्म तान्न सफल हुने अपेक्षा गरिएको छ । ‘बलिदान’ लाई चाडपर्वको माहोलमा दर्शकहरूका लागि एउटा उत्कृष्ट मनोरञ्जनको खुराकको रूपमा हेरिएको छ ।
यसअघि ‘बलिदान’ का प्रमुख अभिनेता समीर भट्टको जन्मदिनको अवसरमा प्रि-टिजर सार्वजनिक गरिएको थियो, जहाँ समीर देशभक्तिपूर्ण भावनाले ओतप्रोत संवाद र दमदार एक्सन दृश्यसहित देखिएका थिए । सो प्रि-टिजर नेपालसहित नेपालीहरूको बसोबास रहेका दर्जन बढी देशहरूमा युट्युब ट्रेन्डिङमा आएको थियो । आसुसेन फिल्म्स प्रा.लि. को प्रस्तुति रहेको यस फिल्ममा समीर भट्ट, सौगात मल्लसँगै अर्पण थापा, ऋचा शर्मा, कविता राय, हेमन्त बुढाथोकी, प्रेम पुरी लगायतका कलाकारको अभिनय रहेको छ । पवन ब्राडफोर्ड बिस्ट निर्माता तथा प्रेम पुरी कार्यकारी निर्माता रहेका छन् ।
