कलाशैली संवाददाता । आगामी शुक्रवार (जेठ ३० गते) रिलिज हुने नेपाली फिल्म ‘महाभोज’को अग्रिम टिकट बुकिङ खुला भएको छ । देशभरका मल्टिप्लेक्स र सिङ्गल स्क्रिन हलहरूमा बुकिङ सुरु भएको हो । यो फिल्म दुई साता अघि रिलिज हुने तयारीमा थियो, तर राजनीतिक आन्दोलन र अन्य कारणले रिलिज मिति सरेर जेठ ३० गते पुगेको छ ।

वितरकहरूका अनुसार फिल्मले प्रारम्भिक चरणमा देशभर करिब २०० शो प्राप्त गरेको छ । काठमाडौं, पोखरा र बुटवलमा आयोजित प्रिभ्यु प्रिमियरबाट फिल्मले व्यापक सकारात्मक प्रतिक्रिया पाएको छ । प्रिभ्यु शोमा सहभागी केही सहकारी पीडितहरूले फिल्मले आफ्नो दबिएको आवाजलाई सशक्त रूपमा प्रस्तुत गरेको भन्दै प्रशंसा गरेका छन् । उनीहरूले यो फिल्म धेरै दर्शकले हेरेर राज्यलाई थप दबाब दिनुपर्ने बताएका छन् ।

विकास सुवेदीको लेखन र दिनेश राउतको निर्देशनमा बनेको यो फिल्ममा आर्यन सिग्देल, दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ, बुद्धि तामाङ, कमलमणि नेपाल, मोहन निरौला, वसुन्धरा भुसाललगायतको अभिनय छ । विशेष भूमिकामा सुरक्षा पन्त पनि देखिनेछिन् । क्लक वर्क क्रियशन र पिक्चर फ्रेमद्वारा निर्मित यो फिल्मका निर्माता हिमाल कडरिया हुन्।