कलाशैली संवाददाता । अभिनेता पल शाह निर्देशक चन्द्र पन्तको आगामी फिल्म ‘आ बाट आमा’ मा अनुबन्धित भएका छन् । शाहले स्क्रिप्ट मन परेर आफू यस फिल्मसँग जोडिएको बताएका छन् । शाहका अनुसार ‘आ बाट आमा’ को स्क्रिप्ट एकदमै भावनात्मक (इमोशनल) छ। उनले भने,‘यो फिल्मको स्क्रिप्ट एकदमै इमोशनल छ । अनि दिग्गज कलाकारको टिम लिएर निर्माण गर्न लाग्नु भएको रहेछ । त्यसैले पनि काम गर्न लागेको हो।’
उनले आफूले अहिलेसम्म गरेका फिल्महरूमध्ये यो नै सबैभन्दा भावनात्मक हुने विश्वास व्यक्त गरे। शाहले निर्देशक चन्द्र पन्तको अघिल्लो फिल्म ‘ह्रस्व दीर्घ’ हेरेपछि आफू प्रभावित भएको बताए ।
यसअघि नै अभिनेत्री विपना थापा यस फिल्ममा आमाको भूमिकामा अनुबन्धित भइसकेकी छन् । निर्देशक पन्तले थापालाई ‘ह्रस्व दीर्घ’ मार्फत १६ वर्षपछि फिल्ममा फर्काएका थिए । शाहले फिल्मको छायांकन चाँडै सुरु गर्न निर्देशक पन्तलाई आग्रह गरेको बताएका छन् । फिल्म १५ फागुनदेखि प्रदर्शनमा आउने जनाइएको छ ।
