कलाशैली संवाददाता । अभिनेता राजेश हमालको ८ वर्षपछिको कमब्याक फिल्म ‘नरसिंहाः अवतार’ आज शुक्रबारबाट प्रदर्शनको दोस्रो सातामा प्रवेश गरेको छ । निर्माण पक्षका अनुसार, फिल्मले पहिलो सातामा २ करोड ४ लाख ग्रस कलेक्सन गरेको छ । यद्यपि, सरकारको आधिकारिक बक्सअफिस तथ्यांकअनुसार पहिलो साताको ग्रस कलेक्सन १ करोड २२ लाख रुपैयाँ रहेको छ ।
हमालको अनुबन्धले चर्चा बटुलेको यो फिल्मको प्रमोसनमा स्वयं उनले निकै मेहनत गरेका छन् । सामान्यतः प्रमोसनमा कम सक्रिय रहने हमालले ‘नरसिंहाः अवतार’का लागि रिलिजको सुरुवाती दिनदेखि नै काठमाडौं उपत्यकाका प्रमुख सिनेमा हलहरूमा दर्शकसँग भेटघाट गरे । हाल उनी दर्शक भेट्न देश दौडाहामा छन् । पूर्वी नेपालको यात्रा पूरा गरी पश्चिम नेपालमा पुगेका हमाललाई अभिनेता राज कटुवाल, अभिनेत्री सनिशा भट्टराई र वितरक छविराज ओझाले साथ दिइरहेका छन् ।
काठमाडौँ वितरक करण श्रेष्ठका अनुसार, दोस्रो सातामा पनि दर्शकको उत्साह उत्तिकै छ । अधिकांश दर्शकले राजेश हमालको अभिनयलाई उत्कृष्ट मानेका छन् । दीवाकर भट्टराईद्वारा निर्देशित यो फिल्ममा हमालसँगै राज कटुवाल, नीति शाह, सनिशा भट्टराई, नीर शाह, प्रशान्त ताम्राकार, राजीवजंग बस्नेत र रमेश चन्द सोडारीको अभिनय छ ।
क्रियटिभ सिने आर्ट्सको ब्यानरमा निर्मित यो फिल्मका निर्माता नेम महर्जन, दीपक ढकाल, नरेन्द्र महर्जन र ध्रुव न्यौपाने हुन् । राजु विक्रम थापाको छायांकन र साहिल खानको सम्पादन रहेको ‘नरसिंहाः अवतार’ले दर्शकको मन जितिरहेको छ ।
