कलाशैली संवाददाता । आर्टमाण्डू नेपालको ब्यानरमा बनेको फिल्म ‘ऊनको स्वीटर’ प्रदर्शनको चौथो सातामा प्रवेश गरेको छ । निर्माण पक्षका अनुसार, फिल्मले देशभर १० करोड ५ लाख रुपैयाँ ग्रस कलेक्सन गरेको छ । तर, सरकारको आधिकारिक बक्सअफिस तथ्यांकअनुसार, चौथो शुक्रबार मध्यान्ह १२ बजेसम्म फिल्मले ८ करोड ९० लाख ५० हजार १८० रुपैयाँ मात्र ग्रस कमाएको छ ।

नवीन चौहानको लेखन र निर्देशनमा बनेको यो फिल्म हेर्ने दर्शकले कथावस्तु, संवाद, अभिनय र निर्देशनको प्रशंसा गरेका छन् । फिल्ममा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर र सुनिल पोखरेलको अभिनय छ । समीक्षक र दर्शकको सकारात्मक प्रतिक्रियाले फिल्मको लोकप्रियतालाई थप पुष्टि गरेको छ ।

विदेशी बजारमा पनि फिल्मले राम्रो प्रदर्शन गरिरहेको छ, तर ओभरसिज कलेक्सनको विवरण अझै सार्वजनिक भएको छैन । देशको ठूलो मल्टिप्लेक्स चेन क्युएफएक्स सिनेमाजले व्यावसायिक सफलताका आधारमा यो फिल्मलाई ‘सुपरहिट’को ट्याग दिएको छ । यो फिल्म वि.सं. २०८२ को पहिलो सुपरहिट बनेको छ ।