कलाशैली संवाददाता । भारतीय सुपरस्टार यश पौराणिक कथामा आधारित बहुप्रतीक्षित फिल्म ‘रामायण’मा रावणको भूमिकामा देखिने भएका छन् । फिल्मको छायांकन हालै सुरु भएको छ र सेटबाट यशको पहिलो तस्विर सार्वजनिक भएको छ । तस्विरमा उनी शक्तिशाली र आकर्षक एक्सन अवतारमा रावणको नयाँ शैलीमा प्रस्तुत भएका छन्, जसले दर्शकमा उत्साह जगाएको छ ।
यो फिल्ममा यश अभिनेताको साथै सह-निर्माताको भूमिकामा पनि छन् । नमित मल्होत्राको प्राइम फोकस स्टुडियो र यशको मोन्स्टर माइन्ड क्रिएशन्सद्वारा संयुक्त रूपमा निर्मित यो फिल्मको निर्देशन ‘दंगल’ र ‘छिछोरे’ जस्ता ब्लकबस्टर फिल्मका निर्देशक नितेश तिवारीले गरिरहेका छन् । ‘रामायण’ दुई भागमा रिलिज हुनेछ—पहिलो भाग सन् २०२६ को तिहार र दोस्रो भाग सन् २०२७ को तिहारमा दर्शकमाझ आउने तय भएको छ ।
फिल्मको एक्सन दृश्यलाई विश्वस्तरीय बनाउन हलिउडका प्रख्यात स्टन्ट निर्देशक गाय नोरिसले यशसँग सहकार्य गरिरहेका छन् । ‘म्याड म्याक्स: फ्युरी रोड’ र ‘द सुसाइड स्क्वाड’ जस्ता फिल्ममा आफ्नो कौशल प्रदर्शन गरिसकेका नोरिसले ‘रामायण’का लागि भव्य एक्सन दृश्यहरू डिजाइन गरिरहेका छन् । यशले पहिलो भागका लागि ६० देखि ७० दिनसम्म छायांकन गर्ने जानकारी प्राप्त भएको छ ।
‘रामायण’मा उच्चस्तरीय भीएफएक्स, भव्य सेट, उत्कृष्ट एक्सन र बलियो स्टार कास्टको संयोजन रहनेछ । यशसँगै रणवीर कपूर (राम), साई पल्लवी (सीता), रवि दुबे (लक्ष्मण), लारा दत्ता (कैकेयी), सनी देओल (हनुमान) र काजल अग्रवाल (मन्दोदरी) मुख्य भूमिकामा देखिनेछन् । यो फिल्मले नेपाली, भारतीय र विश्वव्यापी दर्शकलाई आकर्षित गर्दै सांस्कृतिक र मनोरञ्जनात्मक प्रभाव पार्ने अपेक्षा गरिएको छ ।
