कलाशैली संवाददाता । अभिनेता आर्यन सिग्देल र अभिनेता खगेन्द्र लामिछाने लामोसमयदेखि आफ्नो कला र प्रतिभाले दर्शकको मन जित्दै आएका छन् । खगेन्द्र अभिनयसँगै लेखन, निर्माण र निर्देशनमा पनि सक्रिय छन् भने आर्यनले पनि फिल्म निर्माणमा हात हालेका छन् । यी दुईले गत वर्ष (वि.सं. २०८१) मा पहिलोपटक फिल्म ‘के घर के डेरा घर नम्बर २’ मा सहकार्य गरे, जुन प्रदर्शन भइसकेको छ । उनीहरूको अर्को सहकार्य ‘महाभोज’ आगामी जेठ १५ मा प्रदर्शनको तयारीमा छ ।
आर्यन र खगेन्द्रको फरक फिल्म शैलीका कारण उनीहरूको सहकार्यप्रति दर्शक र सञ्चारकर्मीमा कौतुहलता थियो । पर्दामा मात्र होइन, पर्दाबाहिर यी दुईको सम्बन्ध कस्तो होला भन्ने जिज्ञासा पनि उत्तिकै थियो । तर, फिल्मका प्रचारप्रसारका लागि आयोजित पत्रकार सम्मेलनमा यी दुईले आफ्नो ‘ब्रदरहुड’ लाई स्पष्ट रूपमा प्रस्तुत गरे । एकअर्कालाई ‘दादा’ भन्दै जिस्कने शैली र खुला संवादले उनीहरूको आत्मीय सम्बन्ध झल्किन्थ्यो ।
‘हामीले सँगै काम गरेका थिएनौँ, तर काम गरेपछि हाम्रो सोच निकै मिल्दो रहेछ । अहिले हामी नियमित संवादमा छौँ र व्यक्तिगत कुरा पनि सेयर गर्छौँ’, खगेन्द्रले भने । आर्यनले पनि खगेन्द्रसँगको मित्रताले फिल्मबाहेक अन्य विषयमा पनि कुराकानी गर्न रमाइलो लाग्ने बताए । यो ‘ब्रदरहुड’ लाई कलाशैलीकर्मी कुवेर डंगोलले आफ्नो क्यामेराको लेन्समार्फत कैद गरेका छन् । पर्दाभित्र र बाहिरको यो मित्रताले दर्शकलाई थप उत्साहित बनाएको छ ।
