कलाशैली संवाददाता । सन्तोष गौतमको लगानीमा निर्मित फिल्म ‘जन्ते बाख्रो’ को ट्रेलर सार्वजनिक भएको छ । सोमबार राजधानीमा आयोजित एक विशेष कार्यक्रममा सार्वजनिक गरिएको ३ मिनेट ५२ सेकेन्ड लामो ट्रेलरमा प्रेमकथा र हास्यको आकर्षक मिश्रण देख्न सकिन्छ ।
सिमोस सुनुवारद्वारा निर्देशित यो फिल्मको ट्रेलरले दर्शकहरूमा कौतुहलता जगाउन सफल भएको छ । नेपाली समाजमा दुलही भित्र्याउने दिन खुवाइने भोजलाई ‘जन्ते बाख्रो’ भन्ने प्रचलन छ र ट्रेलरले यो कथालाई आधार बनाएर फिल्म निर्माण भएको संकेत गर्छ । आगामी जेठ २३ गतेबाट यो फिल्म नेपालसहित विदेशमा एकसाथ प्रदर्शनमा आउने तयारीमा छ ।
मुईन इन्टरटेनमेन्टको प्रस्तुतिमा बनेको ‘जन्ते बाख्रो’ सामाजिक हास्य कथावस्तुमा आधारित छ । फिल्मको कथा, पटकथा र संवाद प्रदीप भारद्धाजले लेखेका छन् । फिल्ममा सौगात मल्ल, गरिमा शर्मा, आशिफ शाह, रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम र कुशल गजमेरलगायतका कलाकारहरूको अभिनय रहेको छ ।
फिल्ममा हरि हुँमागाईंको डिओपी, उत्तम हुँमागाईंको सिनेमाटोग्राफी, सुनिल शिवभक्तिको सम्पादन रहेको छ । टिफल्क फिल्मस्ले वितरण गर्ने यो फिल्मको डिजिटल राइट्स जी टु वान डिजिटलले खरिद गरेको छ ।
जेठ २३ गतेबाट नेपाल र विदेशमा एकसाथ रिलिज हुने यो फिल्मले नेपाली दर्शकहरूलाई हँसाउने र भावुक बनाउने दुवै उद्देश्य राखेको छ । ट्रेलरको सकारात्मक प्रतिक्रियाले फिल्मप्रति दर्शकको उत्साह र अपेक्षा बढाएको छ ।
