कलाशैली संवाददाता । सामाजिक यथार्थलाई पर्दामा उतार्न माहिर निर्देशक दिनेश राउतको नयाँ फिल्म ‘महाभोज’ जेठ १५ गतेदेखि प्रदर्शनमा आउँदैछ । ‘प्रसाद’, ‘प्रकाश’ र ‘पुजार सार्की’ जस्ता सामाजिक कथामा आधारित फिल्मबाट चर्चा कमाएका राउतको यो मल्टिस्टारर फिल्मले सहकारी ठगीको गम्भीर मुद्दालाई उजागर गर्ने लक्ष्य राखेको छ । सहकारीमा सर्वसाधारणको बचतमाथि सञ्चालक र पहुँचवालाहरूको दबदबा र त्यसले निम्त्याएको अन्यायको कथालाई यो फिल्मले प्रस्तुत गर्नेछ ।
निर्देशक राउतका अनुसार, ‘महाभोज’ केवल एउटा कथा होइन, यो समाजको ऐना हो । फिल्मले सहकारी ठगीको वर्षौंदेखिको समस्यालाई गहिरो अध्ययनपछि पर्दामा ल्याएको छ । यो कुनै एक व्यक्तिमा केन्द्रित नभई सिंगो संरचना र प्रवृत्तिको कमजोरीमाथि प्रश्न उठाउँछ ।
‘हामीले अहिलेको एउटा समस्यालाई फिल्ममा उठान गरेका छौँ । पिडितको कुराहरू, न्युजलाई आधार मानेर फिल्मको कथा तयार गरिएको छ । फेरी पुरै फिल्म सहकारीमै मात्र होइन, यो एउटा कारक मात्र हो’, निर्देशक राउतले भने ।
उनले सत्ता र सहकारीको मिलेमतोले निम्त्याएको अन्याय र मौनताको पर्दाफास यो फिल्मले गर्ने बताए । ‘यो लाखौँ पीडितको कथालाई प्रतिनिधित्व गर्ने प्रयास हो’, निर्देशक राउतले बताए । फिल्ममा दयाहाङ राईको बहुआयामिक भूमिका छ, जुन न पूर्ण नायक न पूर्ण खलनायकको रूपमा प्रस्तुत गरिएको छ । निर्देशक् राउतले कथाले दर्शकलाई आफैँ मूल्यांकन गर्ने ठाउँ दिने बताए ।
फिल्ममा धेरै स्टार कलाकारहरूको उपस्थितिलाई लिएर राउतले भने,‘कथाको मागअनुसार पात्रहरू छन् र तिनलाई जीवन्त बनाउन उपयुक्त कलाकार छनोट गरिएको हो । फिल्म चलाउनकै लागि मात्र कलाकार राखिएको भन्ने होइन । यद्यपि, उहाँहरूको कारणले सुरुआती व्यापार हुन्छ भन्नेमा दुइमत छैन ।’
उनले फिल्म हेरेपछि दर्शकलाई अब चुप लागेर बस्नु हुँदैन, न्यायका लागि बोल्नुपर्छ भन्ने भावना विकास हुने बताए । ‘महाभोज’ ले समाजका गहिरा प्रश्नहरूलाई पर्दामा उतार्ने प्रयास गरेको छ । फिल्ममा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल, र मोहन निरौलाको प्रमुख भूमिका छ । क्लकवर्क क्रियशन र पिक्चर फ्रेमको संयुक्त प्रस्तुतिमा बनेको यो फिल्म हिमाल कडरिया निर्माता र विकास सुवेदी लेखक हुन् ।
