कलाशैली संवाददाता । नवीन चौहान निर्देशित फिल्म ‘ऊनको स्वीटर’ले दर्शकसँगै सेलिब्रेटीको मन जितेको छ । गत बुधबार साँझ काठमाडौँमा आयोजित विशेष शोमा अभिनेत्री मनिषा कोइराला, क्याप्टेन विजय लामा, गायक राजेश पायल राई, संविधानविद् डा. भीमार्जुन आचार्य, नेतृ नबिना लामा, पत्रकार दिलभुषण पाठक लगायतले फिल्म हेरेर प्रशंसा गरे।

मनिषाले फिल्मलाई ‘सुन्दर र मन छुने प्रेमकथा’ भन्दै जातीय सीमामाथिको माया, सांस्कृतिक विविधता, सङ्गीत र अभिनयको तारिफ गरिन् । ‘हामी हाँस्यौँ, रोयौँ, नेपालको विविध आत्मा अनुभव गर्‍यौँ’, उनले भनिन् । राजेश पायल राईले निर्देशन र अभिनयलाई ‘सुगन्धित फूलजस्तो’ भनेर प्रशंसा गरे । विजय लामाले कथालाई ‘अर्ग्यानिक’ र निर्देशकलाई ‘अमेजिङ स्टोरीटेलर’ भन्दै हलमा हेर्न आग्रह गरे ।

फिल्ममा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर, सुनिल पोखरेल लगायतको अभिनय छ। ‘ऊनको स्वीटर’ हाल देशभर प्रदर्शनरत छ ।