कलाशैली संवाददाता । निर्देशक चन्द्र पन्तले आफ्नो नयाँ फिल्म ‘आ बाट आमा’को निर्माण घोषणा गरेका छन् । सोमबार एक थिम पोस्टर सार्वजनिक गर्दै उनले फिल्मको प्रदर्शन मिति २०८२ फागुन १५ गते तोकेका छन् । पोस्टरमा बच्चाले रोइरहेकी आमालाई सान्त्वना दिइरहेको दृश्यले फिल्मको कथा आमाप्रति सन्तानको मायामा केन्द्रित हुने संकेत गर्छ। आर्या इन्टरटेन्टमेन्टको ब्यानरमा निर्माण हुने यो फिल्मको छायांकन भदौबाट सुरु हुनेछ ।

फिल्मका लेखक अभिमन्यु निरवी हुन् भने कलाकार र प्राविधिक टिमको विवरण केही दिनमा सार्वजनिक गरिने पन्तले बताए । यो उनको दोस्रो निर्देशकीय फिल्म हो। यसअघि उनले ‘ह्रस्व दीर्घ’ निर्देशन गरेका थिए, जसले नेपालमा राम्रो व्यापार गर्नुका साथै भारतको ओटीटी प्लेटफर्म ‘जी फाइभ’मा स्थान पाएको थियो ।
पन्तले दर्जनौं नेपाली र भोजपुरी फिल्ममा द्वन्द्व निर्देशनसमेत गरेका छन् । ‘आ बाट आमा’ले पनि दर्शकको मन जित्ने अपेक्षा गरिएको छ ।