कलाशैली संवाददाता । निर्माणको क्रममा रहेको नेपाली फिल्म ‘महाराजधिराज’ मा थप एक स्टार कलाकारको आगमन भएको छ । निर्माण टिमले नायिका वर्षा राउतलाई औपचारिक रुपमा अनुबन्ध गरेको छ । यससँगै कलाकारहरूको बाक्लो उपस्थिति रहने निश्चित भएको छ ।

यसअघि नै ‘महाराजधिराज’का लागि नायिका वर्षा शिवाकोटी फाइनल भइसकेकी थिइन् । अब वर्षा राउतको प्रवेशले फिल्मको आकर्षण थप बढाएको छ । यसमाआर्यन सिग्देल, रमेश उप्रेती र पल शाह जस्ता स्थापित नायकहरू पनि मुख्य भूमिकामा रहनेछन् । साथै, कलाकार जयकिशन बस्नेतले पनि फिल्ममा अभिनय गर्ने पक्का भइसकेको छ ।

परिच्छेद सेनको निर्देशनमा बन्न लागेको ‘महाराजधिराज’ लाई फूलपातीको अवसर पारेर प्रदर्शन गर्ने योजना निर्माण पक्षको छ । यसको कथावस्तु पनि निर्देशक सेन स्वयंले लेखेका हुन् । उनको अघिल्लो निर्देशित फिल्म ‘प्रेमगञ्ज’ ले समीक्षकहरूबाट सकारात्मक प्रतिक्रिया पाएको थियो ।

छत्रेश्वर म्यानेजमेन्ट प्रालिको ब्यानरमा निर्माण हुन लागेको ‘महाराजधिराज’ का प्रस्तुतकर्ता विराज बिष्ट हुन् । बिष्टले यसअघि निर्माण गरेको फिल्म ‘बुलाकी’ ले राष्ट्रिय अवार्ड समेत जित्न सफल भएको थियो । ‘महाराजधिराज’ का निर्माताहरूमा टोपेन्द्र विष्ट, चक्रबहादुर केसी र रवि खड्का रहेका छन् ।