कलाशैली संवाददाता । बलिउडकी चर्चित डान्सर तथा अभिनेत्री नोरा फतेही आज नेपाल आउने भएकी छिन् । उनी विहान संयुक्त अरब इमिरेट्सबाट नेपाल आउने छिन् । नोरा अगाडि नै उनको २३ सदस्यीय टोली शुक्रबार अपराह्न काठमाडौं आइसकेको छ । नोराले बौद्धस्थित हायात मैदानमा आज बेलुका हुने ‘नोरा फतेही लाइभ इन नेपाल’ मा प्रस्तुति दिनेछिन् ।
उनको यो पहिलो नेपाल भ्रमण हो । उनी विमानस्थलबाट सिधै होटल गएर कार्यक्रमस्थल पुग्नेछिन् । त्यसपछि उनले झन्डै एक घण्टा आफ्नो मनमोहक नृत्यमार्फत नेपालीलाई नचाउनेछिन् । बलिउडकी यी डिभा पछिल्लो समय नृत्यमा विश्वभर चर्चित छिन् ।
आइतबार बिहान नोराले वसन्तपुर दरबार स्क्वायरसहितका सांस्कृतिक र पर्यटकीय सम्पदाको भ्रमण गर्नेछिन् । सोही दिन अपराह्न उनी दुबई फर्कने इभेन्ट म्यानेजर मनीष कार्कीले बताए ।
शिक्षाबाट वञ्चित बालबालिकाको सहयोगार्थ ‘ह्युमन रेस्पेक्ट नेपाल’ को सहकार्यमा आयोजित यो कार्यक्रमका लागि खल्ती र आइएमई पेबाट टिकट बिक्री भइरहेको आयोजक वर्ल्डवाइड फिल्मस् नेटवर्क प्रालिका अध्यक्ष देव मगरले जानकारी दिए ।
कार्यक्रममा नेपाली कलाकार दुर्गेश थापा, नृत्याङ्गना तेरिया फौजा मगर, नृत्यकार समर्पण लामा र ‘भ्वाइस अफ नेपाल सिजन ६’ का उत्कृष्ट ५ प्रोसेस पाण्डे, रोशन राई, अर्पणा आचार्य, प्रमेश राई र इन्द्रकला राईले पनि प्रस्तुति दिनेछन्।
