कलाशैली संवाददाता । नायिका नीति शाह यतिबेला फिल्म ‘मोहर’ को गीत छायांकनका लागि चितवन र नवलपरासीमा व्यस्त छिन् । नायक पल शाहसँग ३७ डिग्रीको तातो घाममा गीतको छायांकन गरिरहँदा उनले कोरस डान्सर र प्राविधिक टिमको मिहिनेतप्रति गहिरो सम्मान व्यक्त गर्दै सामाजिक सञ्जालमा भावुक पोष्ट गरेकी छिन् ।
नीतिले कोरस डान्सरको दुखदायी मेहनतले आफूलाई गम्भीर बनाएको उल्लेख गरेकी छिन् । ‘हामी कलाकारले सेटमा छाता, चिसो ड्रिंक, कुर्सी जस्ता सुविधा पाउँछौँ, तर नदी किनारमा तातो घाममा निर्विश्राम नाचिरहेका कोरस डान्सरको मिहिनेत देख्दा मलाई अपराधी महसुस भयो । विशेषगरी मेरो स्टेप बिग्रँदा वा क्यामेरा एङ्गल नमिल्दा उनीहरूले पटक-पटक नाच्नुपर्दा । स्क्रिनमा सुन्दर देखिने केही सेकेन्डका लागि सम्पूर्ण टिमको कति पसिना र समर्पण लुकेको हुन्छ, त्यो देखिँदैन ।’
उनले ब्याकग्राउन्ड डान्सर र प्राविधिक टिमलाई मनदेखि धन्यवाद दिँदै यस्तो टिमको हिस्सा हुन पाउँदा आफूलाई भाग्यमानी ठानेको बताएकी छिन् । नीतिले अभिनय गरेको फिल्म ‘मोहर’ साउन २३ गतेबाट रिलिज हुँदैछ । ओम प्रतिकको लेखन तथा निर्देशन र चुम्बनजंग शाहीको निर्माणमा बनेको फिल्म अगाडि नीतिको अर्को फिल्म ‘नरसिंहाः अवतार’ जेठ ९ गतेबाट रिलिजमा आउनेछ ।
