कलाशैली संवाददाता । यो वर्षको पहिलो महिना बैशाखमा १८ वटा फिल्मले निर्माण इजाजत प्राप्त गरेका छन् । निर्माण अनुमति पाउनेमा चर्चित र नयाँ दुवै खाले निर्माता तथा निर्देशक समावेश छन् । गत वर्षको हिट फिल्म ‘होस्टेल ३’ का निर्देशक सशान कँडेलले नयाँ फिल्म ‘जेनेरेसन: बाउ भर्सेस छोरा’ को लागि इजाजत लिएका छन् । कँडेलकै निर्देशन रहने यो फिल्ममा पदम तामाङ र सन्तोष बानियाँ मुख्य कलाकार छन्।

यस्तै, ‘ह्रस्व दीर्घ’ का निर्देशक चन्द्र पन्तले ‘गुरु’ र ‘आ बाट आमा’ नामक दुई फिल्मको निर्माण अनुमति लिएका छन् । ‘आ बाट आमा’ मा क्रिस्मत सिंह र विपना थापा कलाकारको रूपमा देखिनेछन् ।

खड्क बोहराद्वारा निर्देशित ‘कस्तुरी’ मा वर्षा सिवाकोटी मुख्य भूमिकामा छन् । धीरज अग्रवालले निर्माण गर्ने यो फिल्मले पनि बैशाखमा इजाजत पाएको छ । ‘पूर्णबहादुरको सारंगी’ निर्माण गरेको सेभेन सिजन सिनेमाज प्रालिका विनोद पौडेलले ‘दुई किनारा’ को निर्देशन र निर्माणका लागि अनुमति लिएका छन् भने उदय सुब्बाले ‘तिमी नै’ निर्माण गर्दैछन् ।

बलिराम महतोले अर्पण थापा र सृष्टि श्रेष्ठलाई लिएर ‘द ब्लु लाइट’ बनाउने भएका छन् । एभरेस्ट सूर्य बोहराले ‘गुड लक भैरे’ को निर्देशन र निर्माणको इजाजत लिएका छन् । कलाकार शिव श्रेष्ठले ‘सिद्धार्थ’ निर्देशन गर्ने भएका छन् । यो फिल्ममा शिव श्रेष्ठ र आङदावा शेर्पा कलाकारको रूपमा देखिनेछन् ।

ऋषि लामिछानेको ‘लेखान्त’ ले पनि निर्माण अनुमति पाएको छ । यो फिल्ममा स्मारिका ढकाल र सरोज खनाल लगायतका कलाकार छन् । यस्तै, सुरज कटुवालले अञ्जसा रिजाल र शान्तिदूत पाण्डेलाई लिएर ‘काठमाण्डू कोरिडोर’ निर्माण गर्दैछन् । नेपाली फिल्ममा बैशाखको यो सक्रियताले वर्ष २०८२ मा विविध कथावस्तु र नयाँ प्रतिभाहरूको आगमनको संकेत गरेको छ ।