कलाशैली संवाददाता । जेठ २ गतेदेखि नेपालका हलमा दुई नेपाली फिल्म ‘के घर के डेरा : घर नं. २’ र ‘हेल्लो काँशीराम’ तथा एक विदेशी फिल्म ‘फाइनल डेस्टिनेशन : ब्लडलाइन्स’ रिलिज भएका छन् ।
दीपेन्द्रकुमार खनाल निर्देशित फिल्म ‘के घर के डेरा : घर नं. २’ ले देशभर १५१ शोजबाट खाता खोलेको छ भने रिम विश्वकर्मा निर्देशित फिल्म ‘हेल्लो काँशीराम’ले मात्र ३८ शोज पाएको छ । त्यसैगरी, ‘फाइनल डेस्टिनेशन : ब्लडलाइन्स’ले ९६ शोजबाट प्रदर्शन शुरु गरेको छ ।
एक साताअघिदेखि नै प्रदर्शनमा आएको नवनिर्देशक नवीन चौहानको फिल्म ‘ऊनको स्वीटर’ले भने दोस्रो सातामा पनि १६२ शोजमा आफुलाई टिकाएको छ । विपिन कार्की र मिरुना मगरको जोडी अभिनित यस फिल्मले दर्शकको सुखद प्रतिक्रिया बटुल्दै दोस्रो सातामा पनि न्यू रिलिज फिल्मले भन्दा बढि शोज बटुलेको हो ।
नेपाली साहित्यका उम्दा हस्ताक्षर मानिएका बुद्धिसागरको पटकथा रहेको ‘के घर के डेरा : घर नं. २’ मा खगेन्द्र लामिछाने, आर्यन सिग्देल, केकी अधिकारी, निश्चल बस्नेत, उपासना सिंह ठकुरीलगायतका मल्टिस्टारको अभिनय रहेको छ । रिलिजको पूर्व सन्ध्यामा गत बुधबार गरिएको प्रीमियरबाट यस फिल्मले मध्यम प्रतिक्रिया बटुलेको थियो ।
कमेडी जनरामा तयार पारिएको ‘हेल्लो काँशीराम’मा भने दिलिप रायमाझी, प्रियंका कार्की, अर्जुन गुरुङलगायतको अभिनय रहेको छ ।
