कलाशैली संवाददाता । प्रधानमन्त्री केपी शर्मा ओलीले काभ्रेको बनेपामा निर्माण हुन लागेको अत्याधुनिक ‘सिनेपा:’ इन्डोर छायाङ्कन स्टुडियोलाई नेपाली फिल्म क्षेत्रका लागि ऐतिहासिक क्रान्तिको रूपमा घोषणा गरेका छन् । उनले यो परियोजना करिब छ दशकदेखि फिल्मकर्मीहरूको सपना बनेको बताउँदै अब त्यो सपना साकार हुन थालेको बताए ।
मंगलबार प्रधानमन्त्री निवास बालुवाटारमा चलचित्र विकास बोर्डले आयोजना गरेको विशेष समारोहमा, स्टुडियो निर्माणको औपचारिक शुभारम्भ गर्दै प्रधानमन्त्री ओलीले यो परियोजना फिल्म उद्योगको संरचना विकास र प्रविधि सशक्तिकरणतर्फको महत्वपूर्ण कदम भएको उल्लेख गरे ।
प्रधानमन्त्री ओलीले आफूले पहिलो कार्यकालमै स्टुडियो निर्माणको निर्णय गरेको तर जग्गा विवाद र सरकार परिवर्तनले प्रक्रिया रोकिएको स्मरण गरे । हालको परिस्थितिमा पनि राज्यको ढुकुटीमा पैसा सीमित भए पनि परियोजना पूरा गर्ने संकल्प व्यक्त गरे । प्रधानमन्त्रीले फिल्म क्षेत्रप्रति सरकार सधैँ सकारात्मक र सहयोगी रहेको बताए ।
त्यसैगरी, बालाजुस्थित नेपाल चलचित्र विकास कम्पनीको जग्गा हिनामिनासम्बन्धी विषयमा सञ्चारमन्त्री र सचिवलाई १० दिनभित्र छानबिन प्रतिवेदन बुझाउन निर्देशन दिएका छन् । कार्यक्रममा सूचना तथा सञ्चार प्रविधिमन्त्री पृथ्वीसुब्बा गुरुङले फिल्म क्षेत्रका लागि बहुप्रतीक्षित स्टुडियोको कार्यान्वयन सुरु भएकोमा सन्तोष व्यक्त गर्दै सरकारले पूर्ण सहयोग गर्ने प्रतिबद्धता जनाए ।
कार्यक्रममा पूर्व सञ्चारमन्त्री गोकुलप्रसाद बाँस्कोटा, बागमती प्रदेश सांसद कञ्चनचन्द्र वादे, सञ्चार सचिव राधिका अर्याल, अभिनेता नीर शाह, अभिनेत्री बसुन्धरा भुसाल, कलाकार दीपकराज गिरी, जीतु नेपाल र दीपाश्री निरौला लगायतको उपस्थिति थियो ।
