कलाशैली संवाददाता । नेपाली फिल्म उद्योगका लागि ऐतिहासिक मानिएको अत्याधुनिक इन्डोर छायांकन स्टुडियो ‘सिनेपा:’ को निर्माण कार्य औपचारिक रूपमा सुरु भएको छ । प्रधानमन्त्री केपी शर्मा ओलीले सोमबार प्रधानमन्त्री निवास बालुवाटारमा आयोजित विशेष समारोहमा स्टुडियो निर्माणको घोषणा गर्दै शिलापत्र अनावरण गरेका हुन् ।
कार्यक्रमलाई सम्बोधन गर्दै प्रधानमन्त्री ओलीले स्टुडियो निर्माणलाई नेपाली फिल्म क्षेत्रको युगान्तकारी मोडको रूपमा व्याख्या गरे । उनले सरकारले स्टुडियो निर्माणमा पूर्ण सहयोग गर्ने प्रतिबद्धता जनाउँदै, यसलाई छायांकन, डबिङ र गायन स्टुडियोलाई समेत समेट्ने बहुउद्देश्यीय केन्द्र बनाउन सुझाव दिए ।
स्टुडियो काभ्रेको बनेपा नगरपालिका – १० र १३ मा निर्माण हुने जनाइएको छ। ओलीले यसअघि दोलखा र पालुङटारमा फिल्म सिटी निर्माणको प्रस्ताव ल्याएको तर अपेक्षित समर्थन नपाएको गुनासो पनि गरे।
सूचना तथा सञ्चार प्रविधिमन्त्री पृथ्वीसुब्बा गुरुङले नेपाली फिल्म क्षेत्रले लामो समयपछि सुविधासम्पन्न स्टुडियो पाउन लागेकोमा खुसी व्यक्त गर्दै सरकारले स्टुडियो निर्माणमा पूर्ण साथ दिने प्रतिवद्धता दोहोर्याए। साथै उनले चलचित्र ऐन, मिडिया काउन्सिल र सामाजिक सञ्जालसम्बन्धी विधेयक संसदमा पुगेको जानकारी दिँदै पुराना कानुनलाई समयसापेक्ष रूपान्तरण गर्न सरकार प्रतिबद्ध रहेको बताए ।
पूर्व सञ्चारमन्त्री तथा सांसद गोकुल बाँस्कोटाले स्टुडियो निर्माणका लागि आफूले जग्गा उपलब्ध गराउने पहल गरेको भन्दै स्थानीय जनप्रतिनिधिहरूलाई बधाई दिए । निर्देशक नीर शाहले स्टुडियोमा कृत्रिम बौद्धिकता (AI) र नवीनतम प्रविधि जडान गर्न सुझाव दिँदै यसलाई बहुउद्देश्यीय प्लेटफर्म बनाइनुपर्ने बताए ।
चलचित्र विकास बोर्डका अध्यक्ष दिनेश डीसीले ‘सिनेपा:’ जस्ता ठूला परियोजनाहरू सकारात्मक सोचको उपज भएको बताए । साथै उनले आगामी सातादेखि रियल टाइम बक्सअफिस प्रणाली लागू गरिने जानकारी दिँदै, स्टुडियो निर्माण, बक्सअफिस प्रणाली र चलचित्र ऐन निर्माण तीनै पक्षमा काम अगाडि बढिरहेको जनाए ।
