कलाशैली संवाददाता । चलचित्र विकास बोर्डले अबदेखि आफ्ना अधिकांश सेवा पूर्ण रूपमा अनलाइनमार्फत प्रदान गर्ने भएको छ । बोर्डले अनलाइन सेवा प्रणालीको सम्पूर्ण निर्माण कार्य सम्पन्न गरी सेवा सुरु गर्न अन्तिम तयारी गरिरहेको जनाएको छ । बोर्डका अनुसार अब सेवा ग्राहीहरूले अधिकांश सेवा घरै बसेर नै प्राप्त गर्न सक्नेछन् । अनलाइन सेवा प्रणालीमार्फत कुल ३३ मध्ये ३० सेवा अनलाइनमार्फत प्रदान गरिनेछ भने केवल तीन सेवा मात्र अनलाइनमार्फत सम्भव नभएकाले सेवाग्राहीलाई बोर्डमै पुग्नुपर्नेछ ।

बोर्डले वेबसाइट निर्माण कार्य पूरा गरिसकेको र केही समयभित्रै नयाँ अनलाइन सेवाको उद्घाटन गरिने बताएको छ । अनलाइनबाहेकका तीन सेवामा हार्डकपी दस्तावेज आवश्यक पर्ने भएकाले ती सेवा बोर्डमै उपस्थित भई लिनुपर्नेछ ।

बोर्डले सेवा डिजिटल बनाउँदै फिल्म निर्माणको दर्ता, नवीकरण, चलचित्र जाँच पास समितिलाई सेन्सर सिफारिस, सिनेमा हललाई प्रदर्शन कोड प्रदानलगायतका ३३ सेवा दिँदै आएको छ । अनलाइन सेवा सञ्चालनमा आएपछि बोर्डमा भीडभाड र प्रशासनिक झन्झट कम हुने विश्वास गरिएको छ । बोर्डले अनलाइनबाहेकका सेवा पनि आफैँले प्रक्रिया पूरा गरी घरमै डेलिभरी गरिदिने व्यवस्था मिलाइएको जनाएको छ ।