कलाशैली संवाददाता । नेपाली फिल्ममा स्थापित कलाकारका सन्तानले पाइला टेक्नु सामान्य मानिन्छ । तर, यसपटक भने यो ट्रेन्ड उल्टिएको छ । चर्चित अभिनेत्री साम्राज्ञी आरएल शाहकी आमा नेहा राज्यलक्ष्मी शाहले फिल्ममा डेब्यु गरेकी छिन् । उनले निर्माणाधीन फिल्म ‘आहुति: द वे अफ चेन्ज’ मार्फत अभिनय यात्रा सुरु गरेकी हुन् ।

पछिल्लो केही सातादेखि पूर्वी नेपालको पाँचथर जिल्लामा छायांकन भइरहेको यस फिल्मको सेटबाट साम्राज्ञीले आमा नेहाको गेटअपसहितका तस्बिरहरू आफ्नो इन्स्टाग्राममा सेयर गरिरहेकी छन् । केही दिनअघि नेहा स्वयंले पनि पहेँलो पहिरनमा घोडामा सवार भएको एक भिडियो फेसबुकमा पोस्ट गरेकी थिइन्, जुन फिल्मकै लागि खिचिएको दृश्य थियो । उनको पहिरन र हाउभाउ हेर्दा उनी गाउँको एक प्रतिष्ठित महिलाको भूमिकामा रहेको अनुमान लगाउन सकिन्छ ।

‘आहुति’ मा साम्राज्ञीको पनि प्रमुख भूमिका रहेको छ । यसकारण, दर्शकले पहिलोपटक आमा-छोरीलाई एकसाथ ठूलो पर्दामा हेर्न पाउनेछन्, जुन आफैंमा एक रोचक संयोग हुनेछ । धेरैलाई थाहा नहुन सक्छ, साम्राज्ञीकी आमा नेहा एक गायिका पनि हुन् । करिब चार वर्षअघि सार्वजनिक उनको ‘तिमी र म’ बोलको गीतको म्युजिक भिडियोमा साम्राज्ञीले अभिनय गरेकी थिइन् ।

भवानी संग्रौलाको निर्देशनमा तयार भइरहेको ‘आहुति’ मा साम्राज्ञी र नेहासँगै गायक प्रकाश दूतराज र रिहान गिरीको अभिनय रहेको छ । यो प्रकाश दूतराजको पनि डेब्यु फिल्म हो । फिल्ममा कलाकारहरू ग्रामीण पात्रको भूमिकामा देखिनेछन् । फिल्म दुई भागमा बनिरहेको छ ।