कलाशैली संवाददाता । अभिनेता राजकुमार राव र वामिका गब्बी अभिनीत फिल्म ‘भूल चुक माफ’ को ओटीटी रिलिजमा बम्बे उच्च अदालतले अस्थायी रोक लगाएको छ । भारतीय सञ्चारमाध्यम दैनिक जागरणका अनुसार, पीभीआर इनक्सले फिल्म निर्माण कम्पनी म्याडक फिल्म्सविरुद्ध ६० करोड भारूको क्षतिपूर्ति दाबीसहित उजुरी दर्ता गरेपछि अदालतले यस्तो आदेश दिएको हो ।
यसअघि फिल्म ९ मेमा सिनेमा घरमा रिलिज हुने तय थियो । तर, म्याडक फिल्म्सले अन्तिम समयमा निर्णय परिवर्तन गर्दै १६ मेमा अमेजन प्राइम भिडियोमार्फत ओटीटीमा रिलिज गर्ने घोषणा गर्यो । यसले पीभीआरलाई ठूलो आर्थिक क्षति पुगेको भन्दै कानुनी उपचारको बाटो रोजिएको हो ।
८ मेमा म्याडक फिल्म्सले जारी गरेको विज्ञप्तिमा भने पहलगाम आतंकी हमला र भारत-पाकिस्तानबीचको तनावका कारण सिनेमा हलको सट्टा ओटीटीमा फिल्म रिलिज गर्नुपरेको भनिएको थियो । तर पीभीआरले भने फिल्मको अग्रिम बुकिङ कमजोर भएपछि यस्तो निर्णय गरिएको आरोप लगाएको छ ।
करण शर्मा निर्देशित फिल्ममा राजकुमार राव र वामिका गब्बीसँगै सञ्जय मिश्रा, सीमा पाहवा लगायतका कलाकारको अभिनय रहेको छ । अब अदालतको अन्तिम निर्णय नआएसम्म फिल्मको ओटीटी रिलिज रोकिएको छ । यस घटनाले भारतको फिल्म प्रदर्शन प्रणालीमा ओटीटी र सिनेमा हलबीचको द्वन्द्वलाई पुनः सतहमा ल्याएको छ ।
