कलाशैली संवाददाता । नेपाली ग्रामीण मौलिक परम्परा र सांस्कृतिक रीतिरिवाजलाई पर्दामा उतार्ने उद्देश्यका साथ निर्देशक सिमोश सुनुवारले नयाँ फिल्म ‘जन्ते बाख्रो’ तयार गरेका छन्। यो विशेषगरी विवाह समारोहमा बेहुली पक्षले जन्तीलाई बारी वा खुला चौरमा ‘जन्ते बाख्रो’ अर्थात् विशेष भोज खुवाउने पुरानो परम्परामा केन्द्रित रहेको छ ।
निर्देशक सुनुवारले समयक्रमसँगै विवाह तथा भोजभतेरको शैली परिवर्तन हुँदै गए पनि गाउँघरमा अझैसम्म जीवन्त रहेको यो विशिष्ट परम्परालाई फिल्ममार्फत प्रस्तुत गर्न खोजेकाछन् ।
आफ्नो फिल्मले नयाँ पुस्तालाई नेपाली संस्कार र परम्पराप्रति थप जानकार बनाउने विश्वास सिमोशको छ । ‘जन्ते बाख्रो’ मा कलाकारहरू सौगात मल्ल, आशिफ शाह, गरिमा पन्त, रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, र समापिका गौतम लगायतले अभिनय गरेका छन् ।
यो फिल्म आगामी जेठ २३ गतेदेखि नेपालभरका सिनेमा घरहरूमा प्रदर्शनमा आउने तयारीमा छ ।
