कलाशैली संवाददाता । नेपाली फिल्म क्षेत्रका लागि प्रतीक्षित ‘रियल टाइम बक्सअफिस डेटा’ प्रणाली अबको दुई साताभित्र संचालनमा आउने भएको छ । चलचित्र विकास बोर्डका अध्यक्ष दिनेश डीसीले बिहीबार यस प्रणालीको सफल परीक्षण सम्पन्न भएको जानकारी दिएका छन् ।
अबदेखि कुनै पनि हलले टिकट बिक्री गरेको पाँच मिनेटभित्रै त्यसको तथ्यांक बक्सअफिसको केन्द्रीय सर्भरमा अद्यावधिक हुनेछ । यो प्रणाली कार्यान्वयनमा आएसँगै वर्षौंदेखिको प्रयासले सार्थकता पाउने भएको छ ।
अध्यक्ष डीसीका अनुसार बक्सअफिसको यो डेटामा सरकारी प्रतिनिधि, फिल्म निर्माता र वितरकले मात्र पहुँच पाउनेछन् । यस प्रणालीको सहायताले कुनै पनि फिल्म र हलको व्यापारिक रेकर्डलाई सहजै विश्लेषण गर्न सकिनेछ ।
यसैगरी, बोर्डले आगामी जेठ १५ गतेभित्र आफ्नो सेवा प्रवाहलाई पूर्ण रुपमा अनलाइन माध्यममा रुपान्तरण गर्दैछ । यसपछि सेवाग्राहीले बोर्डको वेबसाइटमार्फत नै सबै सेवा लिन सक्नेछन् । विशेष कुरा त के छ भने, अब सेवाग्राहीलाई कार्यालयसम्म धाइरहनुपर्ने छैन । बोर्डले आवश्यक कागजपत्र सेवाग्राहीकै स्थानमा पुर्याउने तयारी गरिरहेको छ । यसैबीच, चलचित्र विकास बोर्डले अघि बढाइरहेको बनेपास्थित इन्डोर फिल्म छायांकन स्टुडियोको शिलान्यासको तयारी पनि अन्तिम चरणमा पुगेको छ ।
